Tag-iya sa tindahan posibleng makasohan

USA ka lakang na lang og matapos na ang imbestigasyon sa Bureau of Fire Protection sa nahitabong sunog sa Barangay Puerto nga mikalas og walo ka mga kinabuhi samtang lima ang nakalingkawas.

Si SFO3 Rosalito Caratao kinsa Chief of Fire Investigator nga nahinabi sa Sun.Star Superbalita nibutyag nga ang nanag-iya na lamang sa establismento nga mao si Elsa Pana, nanag-iya sa SP Foods and Grocery ang gihulat aron makumpleto ug matino kung kinsa ang manubag sa maong hitabo.

Niadtong Miyerkules gipatawag sa BFP ang tag-iya apan nasayran nga wala kini mitunga hinungdan nga nalangan ang imbestigasyon.

Kung mapamatud-an nga adunay kalapsan ang nanag-iya niini mahimong mapasaka ang reckless imprudence resulting to multiple homicide.

Nasayran nga intensyon nga gisirado sa tag-iya ang pultahan sa ubos nga bahin samtang ang giingong fire exit niini sa likod sirado usab ug gibutangan pa og kahoy human gikataho nga nabiktima na sa pagpangransak hinungdan nga gituyo ang pagsira sa fire exit.

Ang mga witness nga mga mamaligyaay sa merkado nisaysay nga nakadungog sila og buto ug kalit lang miulbo ang itom nga aso.

Gani gipanglabay pa og bato sa mga vendor ang maong establismento tungod kay wala may nanggawas nga mga tawo gikan sa sulod.

Na-suffocate ang walo samtang ang lima nakalingkawas human nakakita og paagi aron makagawas.

Matud ni Caratao nga sa wala pa nahitabo ang insidente gihimo na sa mga inspector ang pahimangno nga butangan og mga fire exits apan nakitang wala gihapon nisubay ang mga pipila ka mga establismento.

Giklaro usab ni Caratao nga walay namatay sa mga survivors sukwahi sa mga nanggawas nga taho sa pipila ka mga mantalaan ning siyudad.