NABLANGKOHAN sa Cleveland Cavaliers ang Atlanta Hawks paagi sa 118-88 nga kadaogan sa Game Four sa NBA Eastern Conference Finals niadtong Martes.
Sa maong kadaogan, moabante na ang Cavaliers sa ilang ikaduha nga NBA Finals sukad 2007.
Mibira si Lebron James og 23 puntos aron mangulo sa Cavaliers samtang si JR Smith midugang og 18 puntos lakip na ang iyang upat ka tres.
"You deserve it, you deserve it. Let's keep going!" ingon ni Cavs coach David Blatt sa pagpahuway ni Lebron sa bench sa himatyanon nga minutos nabilin sa dula.
Kontrolado sa Cavs tanan kwarter diin naglisod ang Hawks pagmugna og rally.
Nasamotan pa sa kataposang kwarter diin nibinat sila og labing taas nga labaw nga 31 puntos.
Mao sab ning ikaduha nga higayon nga gipangulohan ni Lebron ang Cavs paingon sa finals.
Unang misulod si Lebron sa Cavs sa 2003-2004 season hangtod nga na-free agent siya niadtong 2010 diin midesider siya nga mouban sa Heat.
Maghulat ang Cavaliers sa kinsa modaug sa Golden State Warriors batok sa Houston Rockets.
Sulayan sa Houston Rockets karong adlawa nga mobangon gikan sa 3-1 nga biya, nga nabuhat sa koponan ni Hakeem Olajuwon niadtong 1995 batok sa Phoenix Suns ni Charles Barkley.
Gani, nabuhat kini nila batok sa Los Angeles Clippers diin naharos nila ang nabilin nga dula gikan sa biya sa western conference semifinals.
Si Dwight Howard nga gitawagan og flagrant foul one niadtong Game Four nahukman nga dili siya i-suspenso ug makadula karon sa Rockets.