Corpus pabiling walay tatsa | Sun.Star

Corpus pabiling walay tatsa

Time to read
1 minute
Read so far

Corpus pabiling walay tatsa

Tuesday, January 10, 2017

PABILING walay tatsa ang Corpus Christi Knights human gipildi nila ang Southern de Oro Philippines (SPC) junior Sharks, 113-107, atol sa 2016-17 NBTC Developmental League Cagayan de Oro Leg high school division bracket B niadtong Domingo sa gabie didto sa Xavier University Gym.

Nibira og 15 puntos si Jovanne Carlo Jacutin aron mangulo sa Knights, samtang sila PJ Floirendo ug ang 5-foot center nga si Jao Agbong nihatag og 14 ug walo ka puntos, sunod-sunod.

Dili madalidali sa llamado nga Knights ni coach Carlo Magno Dagalea ang junior Sharks ni coach Rey Dangcal human mag-abot sa hingpit nga panag-agbat sa unang tulo ka kwarters.

Nisulay ang Knights pag-inat og distansyang labaw apan kutob lang sila paghawid og duha ka puntos nga lamang pagsirado sa ikatulo nga kwarter, 79-77.

Didto nakabuak ang Knights sa kataposang kwarter human mibinat sila sa ilang kinataas nga labaw nga 12 puntos nga adunay tulo ka minutos nabilin.

Apan, wala misurender ang junior Sharks ug gipagawas nila ang ilang kataposang ginhawa.

Bangis nimugna og rally ang SPC ug giputol nila ang biya ngadto sa duha ka puntos nalang sa iskor nga 109-107 sa 33 segundos nabilin.

Gikan ana, nagmahuyang ang depensa sa Jr. Sharks human gibyaan nila nga abri si Jacutin sa fast-break paingon pagkonektar sa iyang lay-up sa 30 segundos nabilin.

Nisulay pagrekober ang SPC apan wala sila makaporma sa hugot nga depensa sa Knights.

Gisilyo sa Knights ang kadaogan human makonektar ang duha ka freethrow ni Max Anton Mutia.

Aduna na'y 4-0 win-loss card ang Knights, samtang ang SPC anaay 2-2.

Uban nga gipildi sa Knights sa elimination round mao ang Indahag National Highschool Skyhawks, Pilgrim Christian College Junior Voyagers ug Xavier University Highschool Junior Crusaders.

Gipatik sa mantalaang Superbalita Cagayan de Oro Enero 11, 2017.

View Comments