Cavs, Spurs pildi | Sun.Star

Cavs, Spurs pildi

Time to read
less than
1 minute
Read so far

Cavs, Spurs pildi

Wednesday, January 11, 2017

HINGPIT gipildi sa Milwaukee Bucks ang San Antonio Spurs, 109-107, atol sa 2016-17 NBA regular season niadtong Miyerkules, Enero 11, didto sa AT&T Center, home sa Spurs.

Nipupo og 28 puntos, lima ka rebounds ug upat ka assists si Michael Beasley, samtang nihatag sab si Jabari Parker og 22 puntos, pito ka rebounds ug tulo ka assists.

Gikan sa 23-tanan pagsirado sa unang kwarter, nakabira ang Spurs sa ilang kinataas nga labaw nga 13 puntos sa ikaduha nga kwarter apan wala kini nila masustinar.

Gihinayhinayan kini sa Bucks pagputol ngadto sa 89-83 paghuman sa ikatulo nga kwarter ug nakakuha og buylo sa kataposang kwarter.

Nakamugna ang Bucks og 6-0 run gikan nila Greg Monroe, Malcolm Brogdon ug Beasley aron matabla ang iskor ngadto sa 101-tanan.

Gikan ana, nagbinayloay ang Bucks ug Spurs kadyot sa labaw apan ang Bucks maoy nilutaw nga dominante sa kataposan human makonektar ni Brogdon ang iyang tres sa 1:08 minuto aron molabaw og usa sa 108-107.

Sagunsunan pa ni Brogdon og usa sa duha niya nga freethrow aron mahimong duha na ka puntos nga labaw sa pito ka segundos nabilin.

Nisulay ang Spurs nga moapas apan wala makakuha og igong porma sa himatyanon nga segundos.

Giparot sab sa Utah Jazz ang Cleveland Cavaliers, 100-92.

Gitambak sa Jazz ang Cavs sa kataposang kwarter agi pagbinat sa ilang kinataas nga labaw nga 16 puntos, 92-76.

Nisulay og kamang ang Cavs apan wala na maapsan tungod sa kataas sa labaw.

Gipatik sa mantalaang Superbalita Cagayan de Oro Enero 12, 2017.

View Comments