Omayao bagong MPBC light flyweight champ | Sun.Star

Omayao bagong MPBC light flyweight champ

Time to read
1 minute
Read so far

Omayao bagong MPBC light flyweight champ

Wednesday, January 11, 2017

GIPILDI ni Crison “Cowboy” Omayao si Richard Rosales agi sa majority decision aron angkonon ang Mindanao Professional Boxing Championship (MPBC) light flyweight division atol sa main event sa Bakbakan sa Tablon IV niadtong Martes sa gabii, Enero 10, didto sa Tablon Gym.

Naangkon sa 24-anyos nga Omayao sa Valencia City ang mga yango sa duha ka hurado agi sa 97-93 ug 100-90 nga desisyon apan ang usa nihukom og 95-95 nga tabla.

Giabri ni Omayao ang away agi sa iyang kusog nga body shot diin nilupad ang 23-anyos nga Rosales sa pisi sa unang round.

Si Omayao, usa ka kanhi RP champion, ang halos gamugna og atake sa tibook away ug mikonektar kasagaran og klaro ug solido nga mga sumbag.

Gitugot kanunay sa Boholanong si Rosales nga magpa-corner sa pisi kang Omayao apan stratehiya man diay niya aron makakuha og counter-punches.

Nagkalig-on si Rosales sa ikaunom ug pito ka round human mikonektar og klarong mga kumo nga nidapat ngadto kang Omayao.

“Kulang ko sa depensa atong mga round,” ingon ni Omayao.

Gikan ana, nadumala ni Omayao nga molamang sa nahibilin nga rounds sa ilang 10-round main bout.

Konswelo ni Rosales, naangkon niya ang simpatiya sa kapin 3,000 ka manan-away nga nipuno sa Tablon Gym tungod sa iyang mga kinomedya nga inawayan.

Sa ilang professional boxing record, adunay 21-12-7 win-loss-draw record si Omayao, samtang si Rosales anaay 11-4-2.

Sa co-featured fight, nikampyon sab ang kababayan ni Omayao nga si Ramboo Lagos human gipahunong niya ang usa na sab ka Boholanong si Robert Awiten sa ikatulo nga round atol sa ilang MPBC bantamweight championship fight.

Gipatumba ni Lagos si Awiten sa matag round bago matapos ang kataposan sa 1:39 minuto sa ikatulo aron mahunong ang away agi sa technical knockout.

Gipasabmitido sa Zamboangenyong si Kim “The Bull” Lindog si Charlie Cabillas sa Valencia City agi sa technical knock out sa ikatulo nga kwarter atol sa unang co-main bout nga usa ka MPBC flyweight championship.

Kusog ang pagsugod ni Cabillas sa Valencia City sa unang duha ka round agi sa mga solido nga mga kumo apan wala masustinar niya ang mga atake pagtunob sa ikatulo nga round.

Misurender si Cabillas sa kataposang bahin sa ikatulo nga round human maigo ang iyang walang bahin sa iyang ulo sa hook ni Lindog.

Gisponsoran ang mga away sa Konseho sa Barangay Tablon nga gipaangulohan ni Barangay Chairman Romeo Bacarro.

Gipatik sa mantalaang Superbalita Cagayan de Oro Enero 12, 2017.

View Comments