KOMPIRMADO na ang tanan.
Mahinayon na ang away ni WBO welter weight champion Manny Pacquiao batok sa Australianong si Jeff Horn karong Hulyo 2.
Taho gikan sa ABC, gikompirma na kini sa Queensland Government nga ang Brisbane maoy mo-host sa kinadakong boxing match sa kasaysayan sa Australia.
Didto ipahigayon ang ilang away sa Lang Park sa Brisbane.
Sa maong kompirmasyon, llamado sa tapad ang boxing senator nga si Pacquiao tungod sa iyang eksperyensya ug tahod.
Gani, naagian na ni Pacquiao ang klase-klaseng mga bangiitan sa kalibutan apil mga titled fights.
Ang 38-anyos nga Pambansang kamao adunay 59 ka daug, unom ka pilde ug duha ka tabla, samtang ang Australianong challenger anaay 16 ka daug, walay pilde ug usa ka draw.
Ang 29-anyos nga Australiano nagsugod sa iyang professional career niadtong tuig 2013.
Karon, ikabuga niya ang iyang paghawid sa duha ka titulo nga ang IBF Inter-Continental welterweight ug ang WBO Inter-Continental welterweight.
Sa akong panan-aw, basin igo lang man siguro motunob si Pacquiao nga mobati og "hi ug hello" ngadto sa mga Australiano.