Kinsa maghari karon? | SunStar

Kinsa maghari karon?

Time to read
1 minute
Read so far

Kinsa maghari karon?

Wednesday, June 14, 2017

MAGBANGI ang kinakusgan nga mga bando sa pirmirong distrito ug segundong distrito sa city level championships paghinapos sa 2017 Inter-Barangay Basketball Tournament niadtong Miyerkules, Hunyo 14, sa Macasandig covered courts.

Sa main event karong alas 5:30 sa hapon, maagbat sa llamadong Balulang ni court general Rocy Calingin ang Bugo ni coach Christopher Fuentes alang sa city open division nga titulo.

Awhagon sa Balulang ang serbisyo sa duha nila ka lig-on nga sentro nga sila Joey Grant dela Vega ug Reid Cachuela.

Naa sab sa baraha ni Calingin sila Ralph Peñas, Roldan Largo, LJ Aquino ug Natan Felicilda nga mosilbi og hulga sa three-point arc.

Dili sab magpalupig ang Bugo kay naa si Ritchie Muñoz mogwardya sa tunga, samtang naa sab sila Nico Abejero, Frence Obasa ug Jason Baylona momugna og opensiba.

Sa uban dula bago ang panag-agbat sa Balulang ug Bugo, masulay sa Kauswagan ni Barangay Chairman Pedro Balite ang kapas sa Puerto alang sa under-17 city division nga korona sa alas 3:30 sa hapon.

Anaa ang panagkumboya nila Jomarie dela Piedra, Achacoso ug ang tirador nga si Jhunry Menaling diin nag-uban sa unang higayon alang sa Kauswagan gikan sa ilang panag-ribal sa inter-school basketball.

Dili sab maginusara ang sharp shooter forward nga si Stanley Bedolido pagpangulo niya karon sa Puerto kay naa ang matahaan nila nga sentro nga si Roseldo Detablan, kinsa nahimong mahinundangon sa 86-77 nga daug nila batok sa Lapasan sa district II finals niaging Sabado.

Hugton sa Lapasan little dribblers ni coach Rene Ilogon ang ilang dinulaan karon pagsangka sa mas tag-as nga Carmen sa under-13 city final sa alas 2:30 sa hapon.

“We will try to make adjustments and we will how it goes against Carmen,” ingon ni Ilogon.

Sugdan sab ang mga away sa ikatulo nga pwesto sa buntag karong Huwebes, Hunyo 15.

Gipatik sa mantalaang Superbalita Cagayan de Oro Hunyo 15, 2017.

View Comments