Felicilda, Janao ginganlan nga mga bangiitan | SunStar

Felicilda, Janao ginganlan nga mga bangiitan

Time to read
less than
1 minute
Read so far

Felicilda, Janao ginganlan nga mga bangiitan

Thursday, June 15, 2017

GINGANLAN ang Kagay-anong sila Ernest John Felicilda ug Milo Janao Jr. nga mga banggiitang basketbolista sa Elite 60 Development Camp, diin nahuman niaging semana sa Colegio de San Agustin Gym, Makati City.

Ang kanhi Corpus Christi High School guard nga si Felicilda, karon usa na ka point guard sa National University Jr. Bulldogs, nahimong top performer sa under-16 (U16) alang sa National Capital Region.

Nanganlan si Felicilda sa mythical five sa tibook U16 elite team isip best point guard.

Naangkon sab ni Janao Jr., kinsa ang garbo sa Barangay Lapasan ug saligandong forward sa Assumption Montessori School (AMS) Jaguars, ang titulo sa pinaka bangiitang player sa Mindanao sa U18 nga kategoriya.

Dugay na kini nasuta ni coach Eric Altamirano, kinsa naghawid sa Elite 60, ang katakos ni Janao Jr.

Mismo si Altimirano sab ang naghawid sa matag tuig nga National Basketball Training Center tournament ug nakita niya si Janao Jr. nga kanunay mahimong best player sa maong liga.

Uban nga mga Kagay-anon ni-qualify paingon didto mao sila Kent Smith Gelogo sa Jaguars, sila Duff Ross Galas ug Cyrian Boniao sa Southern de Oro Philippines College ug sila Gabriel Nunag ug Matthew Kenyon Du sa Xavier University High School.

“Dako kaayo nga garbo ni sa Cagayan de Oro nga nadiskobre sila ani nga programa diin napili sila sa pinaka elite nga mga bangiitang player sa nasod karon,” ingon ni Arvin Martinez, kinsa ang leg coordinator sa Elite 60 sa Cagayan de Oro.

Gipatik sa mantalaang Superbalita Cagayan de Oro Hunyo 16, 2017.

View Comments