Dughan sa kampyon! | SunStar

Dughan sa kampyon!

Time to read
1 minute
Read so far

Dughan sa kampyon!

Friday, June 16, 2017

NAANGKON sa Lapasan ang titulo sa 13-under agi sa 78-77 nga eskapo batok Carmen atol sa 2017 Inter-Barangay Basketball Tournament City Championships niadtong Huwebes, Hunyo 15, didto sa Macasandig covered court.

Komportable na unta ang Lapasan ni chairman Omar Labuntog paingon sa kadaogan human mikupot sila og 16 puntos nga labaw sa ika-tulo nga kwarter.

Apan, napaingon sa sinugdanan human mabura sa Carmen ni coach Andy Calingin ang biya ug mapaingon sa kulbahinam nga panagsangka sa kataposang duha ka minutos nabilin.

Kampante na unta ang Lapasan nga adunay upat ka puntos nga labaw sa minus minuto nabilin sa dula apan nihatag si Christian Cagas og kabalaka.

Nihatag si Cagas og foul kang Lance Collin Lanuza sa Carmen ug nasagpaan pa og technical foul tungod sa pakigsupak sa tawag sa referee sa 19.6 segundos nabilin.

Gikonektar ni Lanuza, kinsa walay tatsa sa 12 niya ka free throw gikan sa mga foul ug nihuman og 30 puntos sa dula, ang tulo ka freethrows gikan sa personal ug technical foul ni Cagas diin nipaduol sila og usa ka punto nga biya, 75-76.

Naangkon pa gayud sa Carmen ang labaw human mapasulod ni Lanuza ang iyang lay-up sa siyam ka segundos nabilin, 77-76.

Mahimo na unta nga basolanan si Cagas, apan nahimo siyang bayani sa kataposan human makakuha siya og foul kang Lanuza sa 6.3 segundos nabilin diin pulos bando naa sa penalty.

Iyang gipasulod ang duha niya ka charity throws aron mabuhi ang mga dugo sa bench ug fans sa Lapasan paingon sa kadaogan.

“Down na kaayo ko kay feeling nako gitabangan ko tungod sa sensitive fouls ug sa coaching ni Calingin apan maayo gani ang dughan sa akong mga players maoy nagdiktar sa among kadaogan,” ingon ni Lapasan coach Rene Ilogon.

Nisulay si Lanuza paglangkat sa kadaogan apan wala sa porma aron mahatag ang titulo sa Lapasan.

Dako sab og kaabag sila Rocky Martin Curaza, Jericho Ostrea ug mag-igagaw nga Niño ug Toti Baconga sa opensiba sa Lapasan.

Dako sab og tabang si Ben Yana alang sa Carmen.

“We have the height advantage and so on but we lack practice to know each other for a good ball rotation,” ingon ni Calingin.

Gipatik sa mantalaang Superbalita Cagayan de Oro Hunyo 17, 2017.

View Comments