NAGMALAMPUSON ang defending champions Cagayan de Oro National High School o City High pag-abli sa usa na sab nilang kampanya atol sa 8th CDO Inter-Public School Basketball Tournament niadtong Dominggo, Hulyo 16, sa West City Central School (WCCS) covered courts.
Kini, human gipalong sa City High Tigers ang Carmen National High School (CNHS) Thunders agi sa 77-62 nga daug sa ilang panag-agbat sa secondary boys division.
Gipagawas ni Jomarie dela Piedra ang iyang bangis pag-angkon og 15 puntos aron mangulo sa unang kadaogan sa Tigers.
Natala sab sa bagong apil nga ang Macasandig National High School Southern stars ang ilang unang daug agi sa 72-42 nga pagtambak sa Canitoan National High School Blazing Bricks.
Sa under-15, giparot sa Misamis Oriental General Comprehensive High School Legends ang Tablon National High School junior Archers, 50-47.
Sa secondary ladies, nakalingkawas ang Carmen NHS lady Thunders agi sa 34-33 hingpit nga daug batok sa Canitoan NHS lady Truckers.
Giparot sab sa host WCCS Sunset Tigers ang PN Roa Elementary School, 31-28, atol sa elementary boys division.