TAGUM CITY -- Imbes mao na unta ang panahon sa Cagayan de Oro-Misamis Oriental All-Stars makabalos batok sa Davao All-Stars apan wala tugta sa gingtas-an.
Duol na mahatod ni engineer Jun Gunayan ang kadaogan sa Cagayan de Oro-Misamis Oriental apan kalit lang nasuli ang sitwasyon ngadto sa iyang kaatbang nga si Darwin Bermudez diin naa sa ila ang desisyon.
Pilde ang Cagayan de Oro-Misamis Oriental batok sa Davao, 12-14, sulod sa duha ka rounds.
Naunhan sa Davao ang Cagayan de Oro-Misamis Oriental sa iskor 7.5-5.5 sa unang round apan nag-abot sa kulbahinam nga sitwasyon sa ika-duha nga round.
Kampante kaayo ang Cagayan de Oro-Misamis Oriental sa sunod nga round diin tanan sila naghawid sa puti nga pyisa. Aduna lang apan.
Labaw ang Cagayan de Oro-Misamis Oriental og 6-5 sa kamulong paghuman sa ikaduhang round diin gisakwat sa mga daug nila Johnnel Balquin, Levi Mercado, Bryan Jose, Nazario Ubanan, Cleto "Bong" Vasquez ug Fr. Vic Arellano.
Gikinahanglaan nalang nila og duha ka daug sa nabilin nilang dulaan kang Gunayan ug kang National Master Rustum Tolentino, kinsa naatbang si NM Alexander Lupian sa maong round.
Parehas sila Gunayan ug Tolentino nga lamang sa ilang dula kontra sa ilang kadaiyang kaatbang.
Apan, kalit lang nabali ang sitwasyon.
Wala masustinar ni Gunayan ang komportbleng lamang sa iyang posisyon diin lamang siya batok kang Bermudez.
Naa pay kataposang tsansa si Gunayan sa endgame nga tira pawn sa b7 para diretso daug apan nitira sa lahi diin maoy nakapadaug sa Davao.
Napugos lang sab si Tolentino nga mahuman sa tabla ang iyang dula kang Lupian diin lamang siya og usa ka pawn sa usa ka malisod nga rook-and-pawn endgame.
Modaug unta ang Cagayan de Oro-Misamis Oriental kung parehas sila Gunayan ug Tolentino nidaug ug mahuman ang ikaduha nga round sa iskor 8-5 aron molabaw og usa ka punto sa over-all tally.
"Maayo nalang ga wala ko nag-ampo nga modaug ko, pero nag-ampo ko nga modauug kami," ingon ni engineer Allan Diez, ang executive player sa Davao.
Lamang na og duha ka daug ang Davao sulod sa tulo nila nga panag-agbat sa Goodwill Match.
Kutob lang sa tabla ang Cagayan de Oro-Misamis Oriental niagi sa ika-duhang hugna niaging Enero sa Tablon.