GIDEPENSAHAN sa Assumption Montessori School ang ilang titulo human giparot nila ang Liceo de Cagayan University, 69-57, sa final atol sa 2017 West I District Meet secondary boys basketball tournament niadtong Sabado didto sa Xavier University High School covered courts.
Nisurprisa ang 16-anyos nga si Marc Lim og 20 puntos aron mangulo sa opensiba sa Assumption Jaguars, samtang niabag sab ang bitoong forward nga si Milo Janao Jr. og 14 puntos. Gikan sa 13-tanan, nihulga ang Liceo Jr. Titans ni coach Andy Calingin sa second quarter agi pagbinat sa ilang kinataas nga labaw nga lima ka puntos sa iskor 18-13 bago pa man nagamay ang ilang labaw ngadto sa usa nalang pagtapos sa half, 28-27.
Apan, nagkagahi ang Jaguars ni coach James Racines pagtunob sa third quarter human mipabuto sila og 10-2 run aron maangkon ang labaw. Natumban pa sa Jaguars ang pedal aron mainat ang ilang kinataas nga bira nga 18 puntos sa kataposang fourth quarter.
Natay-og kadyot ang Jaguars human maputol ang ilang labaw ngadto sa walo nalang sa kapin dos minutos nabilin sa dula. Kini, tungod nakakuha sila og gamayng buylo agi sa ilang duha ka sunodsunod nga tres.
Apan, gisilyo sa Jaguars ang kadaogan human miadyas sila sa depensa aron mapugngan ang Liceo sa kataposan. Mao ni ang ika-upat nga sunodsunod nga district title sa Jaguars ug ikaduha na sila nikampyon sa City Meet.
“We will try to make our third city meet title but morag taas ang competition, but we will see,” ingon ni Racines. Nangulo sab si Duke Gabriel Bancale og 18 puntos alang sa Liceo, samtang ang anak ni Calingin nga si Paolo niabag sab og 11 puntos.
Konswelo lang sa Liceo, natagak sa Jr. Titans ang host Xavier University High School agi sa 83-81 kulbahinam nga kadaogan sa unang round pa lang.
Naay tulo ka ball possessions ang Xavier nga modaug apan wala manulod diin napaingon sa Jr. Titans ang kataposang possession diin si Bancale nipadaug agi sa buzzer beater nga lay-up.