NAANGKON sa Corpus Christi School ang elementary ug secondary over-all title sa 21st Milo Little Olympics Mindanao Leg, diin pormal gianunsyo atol sa awarding ceremonies niadtong Sabado, Septembre 23, sa Limketkai Center.
Gikan sa hugot nga panaglakag sa elementary over-all, naangkon sa Corpus ang kampyonato sa kataposan agi pagkolekta og 88.5 puntos sa final and official point-system medal count.
Nihuman ang Corpus little Knights og tulo ug tunga ka puntos batok sa hingpit nga nagsunod nga ang Maramag Elementary School (ES), diin nitala og 85 puntos.
Sa partial counting niagi, naglabaw ang Maramag og usa ka punto bago pa man naapsan sa Corpus sa kataposang tali.
“Sa partial counting niagi, naglabaw ang Maramag og usa apan naapsan sa Corpus,” ingon ni Russel Galgao, kinsa ang official tabulator sa Mindanao Leg.
Nibida ang ilang gymnastics, swimming girls ug taekwondo boys and girls sa kataposan, diin nagkumbuya og 21.5 puntos tanan-tanan.
Niagi, nitala og tag-15 puntos ang badminton girls, football ug table tennis boys alang sa little Knights.
Niangkon sab og 10 puntos ilang chess boys, samtang nipupo sab ang badminton boys, chess girls ug table tennis girls og pito, tulo ug duh aka puntos, sunodsunod.
Ang Maramag ES nikuha og 40 sa athletics boys and girls, samtang niibot sila og tag-15 puntos sa lawn tennis girls ug volleyball girls.
Nidugang sab ang ilang basketball ug volleyball boys team og 10 ug lima ka puntos, sunodsunod.
Naa sa ikatulo nga pwesto ang Bulua Central School nga anaay 67.5 puntos, samtang ang Malaybalay City Central School ug Santo Nino CES-Davao naa sa ikaupat ug ikalima nga pwesto nga adunay 58 ug 50 puntos, sa ingnana nga pwesto.
Sa secondary, daan na nikampyon ang Corpus Knights sa secondary division human gilabwan nila ang Misamis Oriental General Comprehensive High School (MOGCHS) atol sa ikaduhang adlaw sa medal tally.
Ug, mas nasolido pa nila ang ilang paghuman sa kataposan nga adunay 173.5 puntos.
Naa lang ang MOGCHS sa ikaduha nga anaay 118 puntos, samtang naa sa ikatulo ang Iligan City National High School nga naay 92.3.
Alang sa ikaupat paingon sa ikapito nga pwesto, sunod-sunod, mao ang La Salle Academy Iligan (45), Agusan National High School-Butuan (43), Xavier University High School (42.6) ug Lanao del Norte National Comprehensive High School (40).
Naa sab ang LOOC National High School (38), Infant School of Jesus-Bukidnon (35) ug Bukidnon National High School (34.7) sa ikawalo paingon sa ika-10, sa ingnana nga pwesto.