NIBIRA si PBA star Carlo Lastimosa og 40 puntos aron sakwaton ang iyang Alumni 2007 ngadto sa 75-69 nga daug kontra sa Batch 2000 atol sa 8th XUHS-ABA Basketball Tournament niadtong Biyernes, Oktubre 20, sa Xavier University Main Campus covered courts.
Kusog ang pagsugod sa 2007 sa first half ug nakabinat sila sa ilang kinataas nga labaw nga 20 puntos.
Apan, bangis nga nibanganon ang XUHS 2000 human maputol nila ang taas nga biya ug nihulga pagdaug sa duha ka minuto sa kataposang fourth quarter.
Gikan sa 68-67 nga labaw sa 2007, adunay tsansa molabaw ang 2000 apan napakyas ni Bimboy Cabrezos ang iyang lay-up.
Namugna pa sa 2000 nga matabla ang dula sa 68-tanan pagkonektar og usa sa duha ka free throw.
Gikan ana, nibayani ang NLEX Road Warriors guard nga si Lastimosa agi pag-igo sa iyang tres sa 49 segundos nabilin.
Wala makatubag ang 2000 gikan ana ug natugtan nila ang 2007 ngadto sa kadaogan.
Solidong nakuptan sa 2007 ang ikaduhang pwesto sa St. Ignatius de Loyola Cup division nga adunay 7-3 win-loss card, samtang naa gihapon ang 2000 sa ikatulo nga pwesto sa St. Peter Faber Cup nga anaay 6-7.
Nalangkat sa Xavier United ang ilang ikaduhang sunodsunod nga daug agi pagtambak sa IAM 98, 77-55.
Niarte si Charome Marte og 22 puntos alang sa daug sa XU United.
Nitala sab og dako si Abelou Sanchez nga adunay 15, samtang nihatag si Lawyer Melber Alinas og 14.
Pabiling buhi gihapon ang pang-agpas sa Batch 1999 nga makasulod sa playoffs human mamintinar nila ang ika-upat nga pwesto sa Faber Cup agi pagangkon sa ika-upat nga sunodsunod nga daug kontra sa 1992, 96-42.
Giparot sab sa 2001 ang 2006, 62-57.