MAG-ABOT na sab ang defending champion Southern de Oro Philippines College (SPC) ug Xavier University (XU) alang sa 2017 CDOBF college division final.
Kini, human gipangdispatsar sa SPC Sharks ug XU Crusaders agi paglingkawas kontra sa ilang kadaiyang kaatbang sa semifinal crossover niadtong Domingo.
Gitagak sa Sharks ang Pilgrim Christian College Voyagers agi sa 104-100 hingpit nga daug, samtang nakaeskapo sab ang Crusaders batok sa top seed Liceo de Cagayan University, 90-86.
Sa resulta, mao ni ang ikatulong sunod-sunod nga panagtagbo sa duha ka hingpit nga karibal diin ang Sharks maninguha mokompleto og grandslam title.
“We will try to complete a grandslam kung tugtan ug duyogan sa panahon and with luck,” ingon ni SPC coach Rey Dangcal.
Dili na makadula ang duha ka bitoong saligando sa Sharks nga sila Mac Labares ug 3-point artist LJ Aquino tungod sa cut-off sa playing years.
Apan, naa sila Jeff Egan, Hardey Alvarez, Kustin Pelomino ug ang magsuong sila Emmanuel Akut III ug IV.
Dili sab magpalupig ang Crusaders ni coach Rocky Calingin pag-agbat nila sa Sharks karong Sabado.
“Taas among respect both kang coach Rey ug iyang team. Ihatag lang namu ang best and leave it inside the court ug sallig ko sa among team and most importantly motivated kami sa kadaogan,” ingon ni Calingin.
Mao sab ni ikaingon ni Dangcal: I always admire coach Rocky for being a good competitor with a lot of passion in the game. I guess we just have to prepare ourselves to be competitive and leave everything to God in whatever the outcome of the game.
Mahitabo ang ilang final nga panag-agbat sa alas-dos sa hapon karong Sabado sa Macasandig covered courts.