Host CdeO daug kontra Macau | SunStar

Host CdeO daug kontra Macau

Time to read
1 minute
Read so far

Host CdeO daug kontra Macau

Friday, December 08, 2017

GITAMBAK sa host Cagayan de Oro City ang Macau agi sa 105-79 nga daug
pag-abri sa ilang kampanya atol sa 1st CdeO Asian Friendship Games 50-above niadtong Miyerkules didto sa XU GYM.

Nitala sila Gitagum Mayor Loloy Mugot ug Loloy Pupos og 26 puntos matag usa, samtang walay tatsa si Sosing Vamenta sa tres nga adunay 12 puntos.

Kusog ra kaayo ang linya sa host team diin gilangkoban sa mga inilang basketbolista sa lokal niadtong dekada 80 nga gipangulohan ni Hermogenes “Ansing” Anciado, kinsa usa ka kanhi saligando sa MICAA-Crispa ug South Western College sa Cebu.

Naa pa sila Mike Rosete, Arnel Acaylar, Joseph Villareal, Rey Tiongco, Bob Pagala, Alex Tongco, Jun Ebalang ug kanhi Ballpals MVP Bobby Diaz.

“Nalingaw ko pagtan-aw kay mao ni ang idol sa tanan niadtong dekada 80 ug mao ni sila sige tabo sa una,” ingon ni XU Crusaders coach Rocky Calingin, kinsa usa sab ka consultant sa City Hall.

Nabyaan na daan sa Cagayan de Oro Team ni Mayor Oscar Moreno ang Macau ug naangkon pa nila ang kinataas nga labaw nga 34 puntos.

Wala makahulga ang Macau sa tanan quarters sa dula.

“Gani naa pa si Manny Diaz nga usa sa inila ug nag-coach lang,” ingon ni Calingin.

Maagbat sunod sa host team ang Chinese-Taipei, diin gidula kagahapon.

Dili angay magkumpyansa ang CdeO tungod kay bastante sab ang ilang line-up.

“Medyo dagko ang Taipei ug hulga sa team nato. Gikinahanglan nga modaug sila,” butyag ni Calingin.

Kung modaug ang Cdeo sa Taipei, maagbat sa host team ang Nanjing China sa kataposang round sa bracket B elimination round.
Daug sab ang Taipei kontra sa Nanjing agi sa 54-42 nga daug.

Top-1 sa matag bracket maoy mag-agbat sa championship.

Sa bracket A, gipukan sa Philippine Airlines ang A-7 agi sa 80-66 nga daug.

Gipilde sab sa Fujian ang Aldino, 67-46.

Gipatik sa mantalaang Superbalita Cagayan de Oro Disyembre 08, 2017.

View Comments