MisOr General Comprehensive H.S. naka-eskapo | SunStar

MisOr General Comprehensive H.S. naka-eskapo

Time to read
less than
1 minute
Read so far

MisOr General Comprehensive H.S. naka-eskapo

Friday, December 08, 2017

WALA tugta sa defending champion Misamis Oriental General Comprehensive High School (MOGCHS) Legends nga makabalos ang Canitoan National High School (CNHS) Blazing Bricks.

Kini, human makalingkawas ang Legends agi sa 51-48 hingpit nga kadaogan kontra sa Blazing Bricks atol sa Cagayan de Oro Inter-Public School Basketball Tournament 15-under boys niadtong Domingo didto sa West City Central School covered courts.

Nitala si Justin Angelo Maputi og 12 puntos aron mangulo sa Legends.

Ang Legends ug Bricks mao ang nag-abot sa final niaging season.

Tsansa na unta makabalos ang Bricks sa kataposang quarter diin nilabaw sila og upat ka puntos sa nahibiling segundos, apan nabuhian nila.

Nakalangkat ang Legends og steals aron matabla ang dula ug nasegundaan pa og turnover sa Bricks diin nakahatag sa MOGCHS og tulo ka puntos nga labaw.

Nisulay og tabla ang Bricks apan wala masulod ang tres nila.

Daug sab ang Patag National High School Snipers kontra sa Tablon National High School Archers, 36-19.

Sa 17-under, giparot sa MOGCHS Cavaliers ang Carmen National High School Thunders, 52-42.

Gipilde sa Indahag National High School Skyhawks ang guest team Opol national High School, 43-40.

Daug sab ang Bricks batok sa Agusan National High School Vikings, 35-31.

Gipatik sa mantalaang Superbalita Cagayan de Oro Disyembre 08, 2017.

View Comments