GISAKWAT ni Jomarie dela Piedra ang Cagayan de Oro National High School ngadto sa 100-98 kulbahinam nga daug batok sa Sacred Heart of Jesus Montessori aron angkonon ang 18-under title paghuman sa 2017 CDOBF Basketball Tournament niadtong Sabado didto sa Macasandig covered courts.
Nihuman si Dela Piedra og 17 puntos, samtang niabag sab sila Angelo Mercado ug Jericho Hermoso og 16 ug 12 ka mga marka, sunodsunod.
Nadiktar sa Sacred Heart ni coach Boy Dacoco ang unang duha ka quarters diin nahuman ang unang half sa iskor 56-49.
Nabali ang hangin sa sunod human maangkon sa City High Tigers ni coach Bismark Labadan ang third quarter agi sa tulo ka puntos nga labaw, 77-74.
Nabinat pa sa Tigers ang ilang kinataas nga labaw ngadto sa walo sa kataposang fourth quarter, apan wala magdugay natabla sa 88-tanan sa 2:17 minutos nabilin.
Nagkaemosyonal ang bando sa City High human gi-eject ni referee Jacky Estroga si Labadan gawas sa dula tungod sa sige tudlo ug reklamo kaniya hinungdan natawagan og duha ka sunodsunod ka technical fouls.
Matod ni Labadan, nireklamo siya kay kontrobersyal ang tawag ni Estroga diin gitawagan si Mercado og cross violation gikan pagtira sa iyang freethrow shot.
“Igo ra man siya (Mercado) nagdawat sa pasa gikan pag-rebound sa iyang kauban,” rason ni Labadan.
Apan, wala damha nga usa man diay kini nga pagsuway alang sa Tigers pagka wala ni Labadan sa korte.
Gikan ana, nagkadikit og ayo ang dula hangtod niabot sa usa na sab ka deadlock sa 98-98 nga adunay 12.2 segundos nabilin sa dula.
Gisalig tanan kang Dela Piedra ang kataposang play, apan wala siya magdahum nga iyang mapadaug ang Tigers.
Gipasulod ni Dela Piedra ang iyang running hook shot sa 1.9 segundo nabilin aron makapante ang Tigers og duha ka puntos nga labaw paingon sa kadaogan.
“Paglutaw nako sa ire, nangita ko og kapasahan pero wala may bakante ug ako nalang gipwersa,” ingon ni Dela Piedra.
Sa pikas bahin, naangkon sa ALB-Panagatan ang women’s title agi sa 60-57 hingpit nga daug batok sa Hornets.
Gikan sa dikit nga fourth quarter, nibida si Rlienz Pepana sa 2:01 minutos nabilin human makompleto niya ang three-point play aron molabaw og duha ka puntos, 54-52.
Nasegundaan pa sa lay-up ni Justin Godez sa 43 segundos aron komportable na ang ALB pag-angkon sa titulo.