GIHAWOD sa host Cagayan de Oro Athletic Association (COAA) ang secondary ug elementary boys basketball team atol sa 2017 Northern Mindanao Regional Athletic Association (NMRAA) Meet, diin nahuman niadtong Sabado.
Kini, human gipangdispatsar sa COAA ang mga pambato sa Bukidnon Gallopers nga ilang natabo sa kadaiyang finals.
Nakalingawas ang COAA-Assumption Montessori School ni coach James Racines kontra sa Bukidnon Gallopers agi sa 84-79 nga daug aron angkonon ang gold medal sa secondary boys division.
Samtang, mao sab ang nahitabo sa ilang manghod nga ang COAA-Saint Mary’s School ni coach Rene Ilogon human gipilde ang baby Gallopers, 64-59, sa elementary boys final.
Nasurprisa ang Assumption Jaguars sa dula human nagkagahi ang Gallopers sa dula kopirar sa ilang unang pag-agbat sa elimination round.
Nilabaw pa ang Gallopers og tulo ka puntos pagtapos sa unang half, 43-40.
Sama sa niagi nilang agbat, nakabangon ang Jaguars sa sunod nga quarter ug nakainat pa og 10 puntos nga labaw bago pa man naputol sa pito pagsirado sa third quarter, 65-58.
Nisulay og apas ang Gallopers sa kataposang fourth quarter apan kutob lang sila pagputol sa tulo ka puntos nga biya, 76-79, sa 46 segundos nabilin.
Gikan ana, nasugpo sa COAA ang tanan mga tsansa sa Gallopers human gilangsang nila ang dula agi pagsulod sa ilang mga freethrows ug morepresentar sa umaabot nga Palarong Pambansa sunod tuig.
Abante sab ang mga batos ni Ilogon ngadto sa Vigan Palarong Pambansa human makalingkawas kontra sa baby Gallopers.
Mao ni ang ikaduhang higayon ni Ilogon nga mag-coach sa COAA sa umaabot nga Pambansa.
Sa pikas bahin, morepresentar sab ang Misamis Oriental General Comprehensive High School (MOGCHS) lady Cavaliers alang sa NMRAA secondary girls human giparot nila ang Valencia.