MASULAYAN sa Misamis Oriental General Comprehensive High School (MOGCHS) BBC ug sa City Central School ang katakos sa inilang guest teams pagpadayon sa 2nd Cagayan de Oro Inter-Public School Basketball Tournament karong adlawa didto sa Nazareth Gym.
Matagsaan sa MOGCHS BBC ug sa City Central Stingers ang mga bando sa Corpus Christi School.
Maagbat sa reigning Palarong Pampook champion MOGCHS ni coach Agustin Yasay Sr. ang CCS lady Knights ni rookie coach Catrina June Pong-Bioncog sa alas-11 sa buntag alang sa ladies division.
Dakong hagit ang maatubang sa first season champion Stingers ni coach Jaypee Jumamoy pag-agbat nila kontra sa CDOBF champions Corpus Christi baby Knights ni coach Leo Dagalea alang sa elementary division sa alas-9 sa buntag.
“Bug-at nga panag-agbat ug must-see nga dula ni,” ingon ni tournament commissioner Raul Fuentes.
Matod ni Fuentes nga mao ni ang sukdanan sa public schools kung nilambo ba ang ilang panglantaw sa liga.
Gani, ang Stingers sulod na sa semifinal sa nagpadayon nga Loyola Cup human gitagak nila ang inilog nga Xavier University Grade School (XUGS) bago lang.
Apan, dili mabasta-basta ang baby Knights tungod kay seryuso kaayo ang ilang coach.
“Coach Dagalea is a serious coach ug dili siya basta-basta modala og team. He is a perfectionist,” butyag pa ni Fuentes.
Sa ubang dula karon, mag-engkwentro ang Macasandig National High School ug Canitoan National High School Southern Stars ug Canitoan National High School Blazing Bricks pag-abri sa dula karong alas-8 sa buntag alang sa 15-under division.
Magsangka sab ang Carmen National High School Thunders ug East Gusa National High School Phoenix alang sa 17-under sa alas-10 sa buntag.
Mag-agbat ang Cagayan de Oro National High School ug Patag National High School Snipers alang sa 15-under sa kataposang dula sa alas-12 sa udto.