“AT SOME point, you have to realize that some people can stay in your heart but not in your life.”
Mao kini ang kanunay nga gisulod nako sa akong huna-huna ug kasing-kasing aron nga dali ko nga maka move on.
Kanunay ko nga gahilak og hangtod karong mga panahona, nasakitan pa gayud ko sa akong kasinatian sa gugma.
Ako diay si Sheila, 27, ug lumulupyo ning Dakbayan sa Cagayan de Oro.
Nagtrabaho na ako sa usa sa mga pribadong kumpanya ning dakbayan.
Ako pa gihapon nga gihambing ang kasakit nga akong gibati bisan pa man og nilabay na ang walo ka bulan sukad nga nasakitan kaayo ko.
Mag upat na ka tuig sukad nga nahimo ko nga hinigugma ang lalaki nga nitabang kanako sukad pa kaniadto ug gimahal ako pag-ayo.
Itago ko na lang sa ngalan nga Hadid ang lalaki nga sukad pa sa una namo nga panagkita, ako ng gimahal sa tibuok ko nga kasing-kasing.
Siya ang una ug katapusang lalaki nga akong higugmaon sa tibuok kong kinabuhi, kana ang anaa sa akong huna-huna kaniadto mao nga siguro naglisod ko paghikalimot kaniya.
Nagtoo ko nga mamahimo ko na gayud nga kapikas si Hadid tungod kay grabe na nga mga pagsulay ang among naagian apan niabot kami sa tulo ka tuig ug mag-upat na unta niadtong milabay nga bulan.
Sakit alang kanamo diin nga ang sitwasiyon na ang dili motugot sa among panaghinigugmaay.
Nailhan ko si Hadid sa eskwelahan sa dihang nagtungha pa kami sa kolehiyo ug sukad sa among panag-ila, dili na gayud kami magbulag kung adunay mga lakaw.
Dihang nigradwar na kami ug nakatrabaho, ayha ko pa siya gisugot human sa pila ka tuig nga nagsige og pangulitawo nako.
Sa una, nahadlok ko kay lage lisod alang kanamo nga magkadayon tungod kay managlahi man ang among tinuohan apan dili na usab nako mapugngan nga dili ibutyag ngadto kaniya ang tinuod ko nga gibati.
Malipayon kami duha sukad nga gitugyan ko kaniya ang akong pagsalig ug gugma.
Apan lisod kaayo nako nga madawat sa dihang nasayran ko nga kaslon na siya ning tuiga og nagpaabot na lang sa petsa sa ilang kasal.
Nasakitan ako pag-ayo tungod kay gitago diay niini nga aduna nay plano ang iyang pamilya nga ipakasal kini ning tuiga tungod kay hadlok kini nga masakitan ako pag-ayo.
Apan sa iyang gibuhat, mas iya kong gipasakitan tungod kay naglaom ko nga atubangon namo ang among tagsa-tagsa ka mga pamilya aron pasabton nga buot na namo nga magpakasal ning tuiga.
Hangtod karong mga panahona sakit pa gayud alang kanako ilabi na sa dihang naghilak kini nga nanawag ug miingon ako gihapon ang iyang gihigugma apan wala na kini mahimo tungod kay hadlok usab kini nga isalikway sa iyang pamilya.
Nanghinaot na lamang ako nga magmalipayon kini sa iyang kinabuhi ug unta madawat na nako ang tanan diin dili tanang moagi sa imong kinabuhi ang magpabilin kanimo hangtod sa hangtod.