USA ang booth sa lungsod sa Talisayan, Misamis Oriental ang namatikdang doulunon sa mga bisita atol sa nagpadayon nga Kuyamis Festival ug booth showcase diha sa Capitol Ground ning panahona.
Kini basi sa naobserbahan sa SunStar SuperBalita nga nakabisita sa ilang booth ug mamatikdan nga ubay-ubay sa katawhan ang mosaka ug mosulod sa maong booth aron magpahulagway.
Kini tungod sa katalagsaon sa desinyo sa booth diin makita ang Sipaka point sa ibabaw nga bahin. Kahinumduman nga ang Sipaka island nga nahimutang sa lungsod ang gasakaan og liboan ka mga tawo gikan sa nagkalain-laing dapit panahon sa Holy Week aron mamalandong.
Si Boyet Cayetuna kinsa Head sa Tourism sa maong lungsod nibutyag nga doul na usab saulogon ang Holy Week ug karon pa daan nanawagan na kini sa katawhan nga bisitahon ang lugar tungod kay gawas nga makapamalandong, masaksihan pa ang nindot nga talan-awon gikan sa taas nga bahin sa isla.
Gipasabot sab ni Cayetuna nga ilang nahimo ang maong konsepto tungod kay usa sa nakapaila og maayo sa lungsod kining isla sa Sipaka. Daw aduna silay gipilian nga laing mga desinyo apan naaprobahan kining konsepto sa sipaka.
Tungod usab kay criteria sa paghimo sa booth kinahanglan ginama gayud sa lubi gibutyag niini nga 90 porsiyento sa materyales sa booth naggikan gayud sa lubi sama sa bunot, lukay, ginabas nga kahoy ug uban pa.
Aduna usab mga specialty sa lungsod nga mapalit sulod sa booth.
Gawas niini gibida sab sa lungsod ang preskong seafood restaurant sa dakbayan diin bida ang ilang lamiang “Sutukil” kon sugba, tula kilaw nga usa sa ilado sa dakbayan.
Daghan sa mga bisita gikan sa laing dapit ang mohapit sa dakbayan aron mokaon sa kan-anan daplin sa baybayon.
Duha ka mga kan-anan sa dakbayan ang mo-serve ug Sutukil ug kini mao ang Nita’s Place ug Kan-Anan by the Sea.
Lakip sa gipasigarbo sa lungsod mao ang Pangpangon and Sipaka Cave Diving Spot.
Kung mo-dive ka kinahanglan uban ang instructor sa 100 metro kalawomon ug dinhi madiskubre ang nagkadaiyang hitsura sa corals, whale sharks, lion fish ug moray eels.
Gibida usab ang centennial tree nga makita sa Barangay Pook, sa dakbayan nga adunay 80 ka tiil ang katas-on, 20 ka tiil ang kalapdon ug bout ipapreserbar sa Department of Environment and Natural Resources.
Gawas sa booth sa Talisayan aduna pay laing pito ka mga booth nga makita sa Capitol Ground nga naggikan sa nagkadaiyang lungsod.
Hulati dinhi sa SuperBalita kung unsa sab ang ilang gipasigarbo sa ilang dakbayan ning nagpadayon ang Kuyamis Festival nga giorganisa sa kagamhanan sa probinsya sa pagpangulo ni Misamis Oriental Governor Yevgeny Emano.