KINSA ang makatoo nga ang usa sa outstanding police woman sa nasod, ilado sa daghang accomplishment sa iyang area of responsibility sukad sa iyang pagpamolis ang usa lamang ka tipikal ug simpleng inahan pag-abot sa ilang puloy-anan?
Si Police Senior Inspector Maricris Mulat kinsa hepe sa Divisoria Police Station ning dakbayan sa Cagayan de Oro ang kanunay nga madungog sa mga sibyaan sa radyo mabasa sa nag-unang mantalaan sa dakbayan ug makita sa telebisyon tungod sa iyang mga walay puas nga accomplishment taliwala usa kini ka babae.
Apan luyo niini simpleng inahan lamang si Mulat ug tipikal nga inahan pag-abot sa ilang puloy-anan. Kini ang iyang gibutyag sa interbyu sa SunStar SuperBalita.
"Ako pag-uli sa balay magprepare sa pagkaon, sinina ug shoes sa akong mga anak. I-check ilang bag ug limpyohan kung naa bay basura nga gakabiyaan. I- tsek ang ilang uniform basin naay mga tanod nga nagbitay, akong kuhaon." butyag niini.
Usa ka lalaki, 21 ang edad ug babae, 19 anyos, ang mga anak ni Mulat nga nagtungha sa mga dagkong skwelahan sa dakbayan.
Taliwala nga hingkod na ang pangidaron daw walay hunong ang iyang pag-atiman kanila labina nga busy sa negosyo ang iyang bana samtang wala sab silay katabang kauban sa balay.
Matud ni Mulat nga hatid-sundo sa tunghaan iyang mga anak mismo kaniya ug usahay sa iyang bana ug usahay mohulat kaniya hangtod mahuman ang iyang mga operasyon usa pa makauli sa puloy-anan.
Dugang niini nga close kaayo siya sa iyang mga anak ug sagad open kaayo kaniya sa ilang mga gibati labina daw masayod siya kung adunay giproblema ang mga bata.
"Open pod ko sa ilang mga lovelife ug supportive ko sa ilaha, usahay maapil nako og hatod ilang uyab sa ilang puloy-anan," matud ni Mulat.
Dugang niini nga usa lamang iyang pangandoy isip usa ka inahan ug alang kaniya mission accomplished na dayon siya.
"Makita nako akong mga bata nga mo-graduate kana lang gyod akong pangayuon bahala paghuman nila moingon sila nga My molakaw nako. Bahala magpuyo mo nga independent basta nakahuman mo sa pagtoun," seryosong pamahayag ni Mulat.
Taliwala doul na molampos malaumon ug kanunay niya nga i-ampo nga kalampusan ang paingnan sa iyang duha ka mga anak.
"Bayad kaayo imong mga pag-antos ug kahago kung makahuman sila diba?" matud niini.
rPharmacy ug Business Administration ang mga kurso sa iyang duha ka anak ug daw walay plano mosunod sa iyang yapak.
"Dili sila interesado labina akong lalaki. Kini akong babae usahay mo-observe sa operation nako, basin ra," matud ni Mulat apan daw dili niya mabut-an iyang mga anak kung unsay ilang mga gusto ug igo lang gyod siya sa pagsuporta.
Matud ni Mulat nga mahilig sab sila mag-bonding sa pamilya, mokaon sa gawas ug maglangyaw.
Nasayran nga gawas sa pagkapolis migradwar sab diay og culinary si Mulat tungod kay nagtoun siya og baking.
"Wala pako gahimo og mga orders pero akong tuyo nga malutoan og cake, pizza, pasta akong mga anak," matud niini.
Gawas niini gasige usab kini og practice sa shooting labina nga siya ang usa sa modepensa sa iyang pamilya.
Tips niini sa mga inahan nga susama kaniya nga dili lang kaayo higpitan ang mga anak ug hatagan sila og tsansa nga ipaabot kung unsay ilang mga problema. (sundan pa.)