IGO na lamang sa pagtagamtam ug paglantaw sa iyang mga nakab-ot na nga mga damgo sama sa dili basta-basta nga mga propriedad nga naangkon ang maanyag nga 50-anyos nga si Engineer Gladys Gaccion Opitz.
Lakip niini ang mga mansion nga nahimutang dinhi sa nagkalain-laing dapit sa dakbayan sa Cagayan de Oro ug ingon man ang ekslusibong rest house ug beach resort nga nahimutang sa este nga bahin sa Misamis Oriental.
Labihan kahamugaway ning panahona ang pamuyo ni Gladys tungod kay sayon ra kaayo niining makapalit og mga mahalon nga sakyanan, mahalon nga sapatos ug uban butang nga alang sa uban nga sa damgo lamang makabtan.
Labaw sa tanan nag inusara kini ug iyang bana nga nanag-iya sa mga manufacturing business sa nasod sa Germany ug dinhi sa Pilipinas lakip niini ang pinakasikat karon nga club sa dakbayan sa Cagayan de Oro nga mao ang Pulse.
Apan luyo niining tanan nga mga kahayahay nga naabot sa kinabuhi miagi sab og dili tiaw nga kalisod si Gladys kinsa lumad nga taga Damulog, lungsod sa Bukidnon.
Dinhi gisugdan og saysay ni Gladys iyang naagian sa kinabuhi sa SunStar Team sa SuperBalita ug SunStar Cagayan de Oro dihang iyang giimbita sa iyang private house ug resort sa weste nga bahin sa Misamis Oriental niadtong Huwebes.
"Everytime nga mosaysay ko sa akong kaagi, makahilak gyod ko kay grabe gyod mi ka pobre sa una," emosyonal nga butyag niini.
Matud ni Gladys nga kinamagulangan siya sa duha ka magsoun ug nakatungha sa high school sa usa sa tunghaan nga ekslusibong lamang sa mga babae kaniadto ning dakbayan labina master teacher man iyang inahan ug agriculturist ang amahan.
Wala gyod nakatiwas sa pagtoun si Gladys dihang naminyo sa iyang childhood friend ug nakaanak og duha apan dihang wala nilambo ilang kaminyoun, nagkabulag ug nibalik kini sa iyang inahan dala ang usa ka anak samtang ang usa gidala sab sa iyang bana.
Sunod-sunod nga kalisod ang naagian sa ilang pamilya dihang namalhin sa pagpuyo ning dakbayan. Nakatukod sila og balay apan labihan kapiot ug lamang kadako ug gani wala pay mga bintana.
Gisaysay niini nga niagi sab og ka-lulong sa nagkalain laing bisyo iyang amahan hinungdan nga niabot sa punto nga labihan gyod ang nasinating kalisod sa iyang inahan kinsa nihunong sa pagtudlo ug igsuon nga anaa pa sa elementarya niadtong tungora.
"Akong brother galuto og binignit dayon akong mama maoy gapamaligya para lang gyod maka income," matud niini.
Bout man motiwas sa iyang pagtoun si Gladys apan dili na gyod kini ma-afford sa iyang inahan dihang namatay sab iyang amahan.
Tungod niini, nisulay sa pagtake og scholarship si Gladys sa programa sa gobyerno nga makatoun sa nasod sa Germany. Kini nga programa gitawag nga Deutscher Akademischer Austauschdienst o Daad, usa ka student exchange program sa Germany.
Bulahan nga nakapasar sa maong scholarship si Gladys ug gi grab kini niya nga oportunidad. Libre tanan ang paglupad niini paingon sa Germany aron magtungha.
Dili sayon
Susama sa pagtou sa uban nga hayahay ang kinabuhi labina kung makagawas sa nasod, apan dili kang Gladys tungod kay miagi pa siya og lain na usab nga kalisod. Ang iyang allowance dili paigo aron ipadala sa iyang inahan ug igsuon lakip ang iyang gibilin nga anak nga nabilin dinhi sa Pilipinas.
Gikinahanglan usab niyang moeskwela og lenggwahe sa Germany aron sayon ang iyang pagsabot sa mga butang nga gusto niya matun-an. Tungod kay kinahanglan pa niya og igong gasto sa pagtoun nag-sideline siya og trabaho sa usa ka restaurant.
"Tighugas ko og plato ug kalha nga mas dako pa sa akoa. Sa akong kagamay mosulod nalang gud ko sa kalha para malimpyo," butyag niini ug miangkon nga wala siyay igong oras sa katulog ug duha lamang ka oras tungod kay trabaho man ug skwela iyang tuyo.
Gamay ra usab kaayo iyang allowance ug dili gyod kini pwede ipadala sa iyang nabiyaan nga minahal sa kinbuhi. Hinuon kon aduna siyay sweldo sa sideline mapadal-an niya og P1,500 ang iyang inahan sa usa ka bulan.
"Gamay ra gyod kaayo kay dili paman gyod makaya sa budget," dugang niini.
Sa late twenties, milampos gyod si Gladys sa iyang pagtoun isip skolar ug midawat gyod og diploma sa iyang natapos nga kursong Engineering.
Tungod kay maayo usab og pangutok, nadawat kini sa usa ka custom-build applications company sa maong nasod diin ang kompanya gipanag-iyahan sa mga ginikanan sa iyang bana karon nga si Haiko.
Gani, si Haiko mismo ang miinterbyu kaniya atol sa iyang pagpangaplay ug usa sa iyang dili malimtan nga pangutana niini.
"How good is your German?" nga daw gitubag sab niya og "as good as your English," mikatawa niining saysay.
Taliwala walay pay eksperensya sa maong klase nga kompanya iyang gipasalig niini nga tagaan lamang siya og panahon ug oras nga matun-an ang tanan buluhaton.
Nagsugod kini isip Autocad employee ug gi-share sab niini nga daghan butang nga iyang inisyatiba nga nakapa-impress sa iyang mga boss.
Trabaho ug balay lamang ang pokos ni Gladys niadtong tungora ug daw dili siya ang tipo sa babae nga kung anaa gawas sa nasod pagmosweldo mopalit dayon og mga mahalon nga butang.
"Wala gyod ko nagpalit og mga butang-butang kay nagtigom ko ug gusto nako insakto ang akong mapadala sa akong anak, mama ug igsuon sa Pilipinas," matud niini.
Duha ka tuig gikan sa iyang pagpanarbaho nakatigom og P2.5 milyon si Gladys gumikan lamang sa iyang sweldo ug iya kining giuli sa Pilipinas.
Sa maong kantidad nagpatukod siya og insaktong puloy-anan sa iyang inahan samtang gipatiwas og pagka-abugado iyang manghod.
Matud ni Gladys nga kaniadto nakasinati ug nakadawat siya og daghang pagsaway gikan sa pipila ka mga negatibong tao sa iyang palibot apan wala kini niya gidumtan, gihimo kini niya nga paagi aron gyod molampos ug makab-ot ang iyang gusto maabot.
Hilig usab niini ang mag-golf kuyog ang mga higala ug usa kini sa hinungdan nga pabiling gwapa ug seksi ning panahona.
Tungod sa iyang naabot, dinhi niya nakumpara kon unsa ang paglantaw sa tao sa adunay kwarta ug ngadto sa mga tao nga walang-wala.
"Mao nga doul gyod kaayo akong dughan sa mga pobre kay niagi ko ug ingon ana kalisod," dugang niini.
Gibutyag usab niini nga wala na niya giambisyon pa nga modato og samot hinungdan nga daghan sa mga orphanage ang gisuportahan niini.
Lakip sa gisuportahan niini ang pagtukod og mga kapilya ug uban pa. Aduna sab kini gipatungha nga mga street children nga karon soud kaayo niya.
Tips niini aron molampos nga kung aduna kay damgo kinahanglan, gyod ang determinasyon ug paningkamot aron makab-ot. Gibutyag niini nga tanan nga butang nga iyang gipanag-iyahan karon lumalabay lamang apan iya lamang gituman iyang pangandoy sa kinabuhi nga magpuyo og komportable.
"Sa gamay pako, ga-dream ko og balay nga naay swimming pool mao nga karon maka-afford nako ako gyod siyang gihimo," matud niini.
Gani iyang duha ka mga anak iya na daan gitambagan nga mag-skwela ug maningkamot sa ilang kaugalingon tungod kay dili niya bout magsalig kaniya sa umaabot.
Sa laing bahin, tulo ka tuig sa iyang pagpanarbaho sa kompanya nila Haiko gibalhin si Gladys sa Admin Department ug gakalantawan na niya si Haiko.
Tungod kay taas, gwapo ug only son kini sa owner sa kompanya daghan ang gakiligon nga mga babaeng empleyado niini gawas lamang kaniya nga pokos gihapon sa pagtigom sa iyang sweldo.
Apan sama ni Rapunzel ang buhok ni Gladys dihang mas pokos ang atensyon ni Haiko kaniya.
Kinsa man gud pod ang dili ma-impress ug madani sa kaanyag ni Gladys nga intelehente, seksi ug gwapa nga Pinay nga maayo pa kaayo diha sa iyang trabaho.
Atangi ang ika-duhang parte sa storya sa kinabuhi ni Gladys ug pokos na niini mao ang lovestory nila ni Haiko.