Hands-on nga amahan | SunStar

Hands-on nga amahan

Time to read
2 minutes
Read so far

Hands-on nga amahan

Sunday, June 18, 2017

DILI lalim ang papel sa usa ka padre de pamilya tungod kay gawas nga sila mga haligi sa panimalay duna usa silay mga personal nga trabaho labina gayud kong kini nagserbisyo sa komunidad.

Ang 41 anyos nga si Police Superintendent Lemuel Gonda, kasamtangan nga tigpamaba sa Police Regional Office (PRO)-Northern Mindanao, 20 ka tuig na nga nagserbisyo isip pulis kinsa amahan sa 11 anyos nga si Danie Gonda, usa ka Grade 6 student.

Matud ni Gonda nga sayon man lang ang usa ka amahan apan pinaagi sa saktong pagdumala sa oras ug panahon. Dugang niini nga kaya ra kaayo ang gihuptan nga responsibilidad isip amahan, bana ug usa ka nagserbisyo sa katawhan ilabi na usa kini ka opisyal sa kapolisan.

Hands on nga amahan si Gonda kauban ang masinabtanon usab niya nga asawa, si Dra. Trinitas Susan Gonda, RN, MD, usa ka Pediatrician, ngadto na sa ilang nag-inusarang anak.

“Usually ako may gahatod, kami gahatod, in fact hands-on mi ana, hatod-sundo usahay di na gale magpasundo akong anak gusto na mag commute kay uban-uban sa iyang classmates,” pahayag ni Gonda.

Proud father usab kini gumikan kay sa pangidaron niini independent na kini ug gani kabalo na kini mag-save ug kini tungod na usab sa ilang mga pahimangno ug disiplina ngadto na sa anak.

“Pwedi na namo siya ipa commute kabalo na siya, pwedi na siya mopadala sa LBC siya ra kabalo na siya kanang mga online online nga mga contacts bah palit og card ibaligya pud niya iyang card, tudloan man siya sa iyang Nanay, independent pwedi na nimo siya suguon adto’g mall,” dugang ni Gonda.

Sa pangutana nga kung unsa kini nga klase nga amahan gibutyag niini nga sakto lamang kini diha sa pagdisiplina sa iyang anak.

“Sakto lang usahay mapitikan gamay kanang di mosugot suguon unya unyaon ka kay tutok didto sa computer, paghuman ana imo napud tagaa’g guidance ing-ani imong sayop,” sigon niya.

Dili, matud pa, lisod ang paggahin og panahon ug oras ngadto na sa pamilya lakip na sa pagtuman sa responsibilidad sa katawhan kung ayuhon lang sa pag-manage sa imong oras.

“Time management lang gyud quality time, treat sa anak mura raba’g barkada para dili siya maulaw dili siya mahadlok, ako siya ingnon kinsa man na imong chicks? gwapa lage na imong chicks, ana ba, dili nimo ingnon nga bawal na, at least imong ipa-aware sa iya nga kung magminyo kag sayo na wa gyud kay paingnan,” ang mapahiyumong pahayag ni Gonda.

Bonding, matud pa niini, ngadto sa pamilya ilabi na sa anak mao ang pag biking, adto sa Mall ug sa layo sa siyudad ilabi na sa mga kaparyentehan.

“Magbike, usahay adtong mall pag-weekend adto sa usa ka area, mga restaurant, magkaon, usahay sa layo sa siyudad, sa igsoon,” pahayag niini.

Nasayran usab nga malipayon usab kini nga nagserbisyo sa pamilya ug kini mismo ang mohimo sa mga simpleng trabahuon sa panimalay ilabi na sa paghikay sayo sa buntag ug lakip sa pagpanghugas og plato.

“Time management lang gyud kay wala man mi maid kami-kami ra man,ako ma’y galuto. hugas plato akong anak pwedi gihapon siya maglung-ag,” sigon ni Gonda.

Matud niini dili lalim mamahimong amahan apan importante lang gayud ang paggahin og panahon sa pamilya inubanan na usab sa pagsalig sa labaw nga Makagagahom aron nga malampuson ang pagpuyo ug matuman ang responsibilidad diha sa pamilya ug sa kumonidad.

“Isip father dili lalim nga di lang ta magminyo nga minyo lang ka ug gwapa, sexy dili na siya, dapat responsable gyud ka, kung maminyo ka unya imong lifestyle mura ra gihapon og ulitawo bulag gyud mo, sige ra ka’g nightlife, sige ra ka’g barkada, wala naka’y panahon sa pamilya, ah maguba gyud,” pahayag dalang pahimangno niini.

Kanunay lang matud pa niini nga pahimangno sa anak kung unsa ka importante nga makalampos diha sa pagtungha aron nga dili masusama sa uban nga kaniadto gasalig sa mga ginikanan nga aduna’y mga saktong trabaho ug natumpawak na hinuon diha sa kaala-otan ilabi na sa mga ilegal nga bisyo.

Sa tanang mga amahan mapasalamaton kami sa inyong kanunay nga pagpangga kanamong mga anak. Dili tanang amahan ang andam nga sagubangon ang mga responsibilidad mao nga angayan lamang nga hatagan og dakong value ang mga amahan nga andam buhaton ang tanan tungod ug alang sa pamilya ilabi na sa mga anak.

Salute sa tanang mga Amahan! Happy Father’s Day!

Gipatik sa mantalaang Superbalita Cagayan de Oro Hunyo 18, 2017.

View Comments