SA TIBOUK Northern Mindanao, si Police Officer 2 May Shell Jangayo Oro nga sakop sa City Police Strategic Unit (CPSMU) sa Cagayan de Oro City Police Office (Cocpo) maoy nag-inusarang napili sa screening aron ikontra sa gikatakdang Gandang Pulis 2018 nga ipahigayon sa Manila.
Ang Gandang Pulis 2018 usa ka programa sa Philippine National Police sa tibouk nasod diin matag rehiyon adunay mga representante.
Kwalipikasyon niini mao ang polis nga babae, opisyal man o dili, single man o minyo nga nag-edad og 24 anyos ngadto 45 anyos. Kini sab nga kalihokan nahisubay sa Women's Month Celebration.
Matud sa 32 anyos nga si May Shell sa interbyu sa SunStar SuperBalita nga dili gayud niya hilig mag-apil og mga beauty pageant ug uwahi niyang naapilan niadtong high school atol sa intramurals.
Dihang girekomenda siya sa iyang mga kauban nga moapil niini gibutyag niya nga wala gayud siya kabalibad.
"Kung pulis man gud ka ug girekomendar ka sa mga dako nimo nagpasabot dako ilang salig sa imoha ug ilang nakita nga fit ka niana. Ako as subordinate ako siyang gidawat ug mosunod rapod ko para sab mapakita nako sa ilaha nga kaya nako ug mahimo ni nako," matud ni May Shell.
Gibutyag niini nga siyam ka mga babaeng pulis ang gipaubos sa screening diin adunay nagikan sa lain-laing probinsya sama sa Bukidnon, Iligan, Camiguin, Misamis Occidental ug uban pa ug atol sa pagpili siya ang migawas nga mahimong representante sa rehiyon.
"Akong feeling ato happy ko nga nakulbaan, nalipay ko nga ako ang napili sa screening at the same time medyo nakulbaan kay ako baya ang ipadala. Dapat baya snappy ta pag-abot didto kay Region 10 baya imong dalhon nga pangalan." matud pa niini.
Preparasyon nga himoun ni Jangayo mao ang pagbasa ug pakisayod sa mga isyu sa kasamtangan alang sa posibleng mga pangutana ug kumpiyansa lamang sa kaugalingon.
"Nagstart nako daan og basa-basa, kay usually question ana dili lang kay about polis kay individual baya ang mga judges." dugang pa niini.
Taliwala sexy na kaayo kini apan gibutyag niini nga gitakdang mobalik siya og gym karong panahona.
Single Mom
Gibutyag ni May Shell nga usa siya ka single mom kay bulag siya sa iyang partner pito na ka tuig ang nilabay.
Aduna siyay usa ka anak nga nagpangidaron na karon og 10 anyos.
Dugang niini nga siya na lamang nag-inusara sa pagpadako sa iyang anak karong panahona ug gibutyag niini nga himoun ang tanan mapadako kini ug mahatag ang insaktong edukasyon alang niini sa umaabot.
Sukad mibiya ang iyang partner, naningkamot siya nga makatrabaho og insakto hinungdan nag-training sa pagkapulis. Walo na ka tuig ang iyang pagserbisyo isip pulis ug bisan adunay anak nga giatiman, dili kini babag alang kaniya.
Dugang sab niini nga ang usa ka babae dili lang unta kutob sa panimalay ug gikinahanglan sab nga motrabaho.
"Lahi ra kaayo kon naa ka sa balay, structured ra kaayo imong trabaho. Narealize nako lahi kon imong partner ra nay income. I also have to earned kay ni atong pangsabon sa lawas iasa pa nato sa atong husband." dugang pa niini.
Gibutyag sab niini nga kon itandi sa uban propesyon ang usa ka babae nga polis dili gyod sayon ang maagian tungod kay daghan pa kaayo nga training ug mahitabo pa nga opawan apan daw kung desidido gyod kaayo niini, walay imposible.
Sa kasaulogan sa Women Month, gibutyag ni May Shell nga kinahanglan ma-edukar ang kababayen-an hilabi na niadtong anaa sa mubo nga hut-ong sa katilingban nga adunay katungod ang mga kababayen-an nga maila sa kadaghanan.
"I want to promote and empower women, dili lang ako apan kami sa PNP among gina-promote para sa tanan babae nga ma-inform sila nga gitagaan na ta og pagtagad nga ma-recognize ug ma-promote karong panahona." butyag niini.
Mensahe sab niini sa mga kaubang polis nga kababayen-an nga sundon ang mando sa kadagkoan nga mahimong presentable nga moatubang sa kliyente.
"Ang mga babae sa PNP gi-required na karon nga dapat manudlay pod kay basin ang magpablotter o mosumbong dili nalang modayon kay makita ang nawong sa polis stress na kaayo. Dili man kinahanglan nga mag make-up at least hapsay pod nga ganahan mosumbong ang mga tao kanato." butyag niini.
Sa gikatakdang journey niini sa Gandang Pulis 2018 nga gilaulaman sa bulan sa Abril matigayon usa lamang ang balon ni May Shell ug dili lamang iyang kaanyag apan kahibalo ug kumpiyansa sa kaugalingon.