Todino: Diskriminasyon sa edad

Monday, February 13, 2012

MATAG tuig nilibo ang mogradwar sa kolehiyo apan dili kapaigo ang trabaho alang kanila.

Bisan sa trabaho nga gitanyag sa abroad daghan gihapon ang walay trabaho karon. Dunay gipangtaktak sa ilang trabaho, duna poy nag-retiro ug nag-resign apan nagkadaghan gihapon ang walay trabaho.

Have something to report? Tell us in text, photos or videos.

Unya kining awhag sa hunta probinsyal sa Misamis Oriental ngadto sa Kongreso pagpasar og balaod nga magwagtang aning diskriminasyon sa edad tubag kaha kini sa problema, labi na niadtong mga nagpanuigon lapas sa 40 anyos?

Matod ni Provincial Board Member Emmanuel Mugot paglapas sa constitutional rights sa usa ka tawo ang dili pag-hire tungod lang kay nilapas na sa edad nga gi-require sa trabaho. Iyang gi-awhag karon ang Kongreso nga mopasar og balaod nga magdili aning diskriminasyon sa edad.

Pero, sa atong kasinatian, discretion gihapon sa kompaniya kon dawaton ba niya ang aplikanti nga may igong edad na. Bisan naa pa kanang balaod, katungod gihapon sa kompaniya ang pagpili kon kinsa ang iyang patrabahoon.

Gawas gud sa edad, dunay ubang requirement nga gipangita ang kompaniya nga haom sa posisyon nga nabakanti. Busa, maglisod gyud gihapon ang edad-edaran nga aplikanti pagkuha og trabaho labi na karong panahon nga daghan nga mga batan-on nga ilang kompetensiya.

Ang bugtong alas niining mga edaran nga aplikanti mao ra gyud ang ilang experience o kasinatian. Kon itandi sila sa bag-ong gradwar makabentaha gyud. Apan, sa ubang aspeto dili sila makakompetensiya sa mga batan-on.

Busa, magdependi tingali unsang matang sa trabaho nga mahimong haom gihapon kining mga aplikanti nga edaran na.

Mas maayo man hinuon nga duna gyud balaod nga magdepensa batok sa diskriminasyon sa edad aron maprotehian ang mga ederan nga aplikanti.
Insakto si Mugot sa iyang giingon nga walay diskriminasyon sa edad didto sa Estados Unidos . Ug mahimo kana dinhi sa Pilipinas kong daghang trabaho ang ikatanyag atong gobiyerno ug mga pribadong kompaniya.

Sa panahon karon nga nihit kaayo ang pagpangita og trabaho, labaw nang maglisod og sulod ang mga edaran. Busa, dili gyud isyu kining diskriminasyon sa edad, apan ang kakuwang sa trabaho.

Ang maayong buhaton sa atong magbabalaod diha sa hunta probinsya mao nga i-focus nila ilang hunahuna pagpangita og trabaho sa atong mga kaigsuonan pinaagi sa pag-imbetar og daghang mga kapitalista ug negusyanti. Di ba?