Besere: Lihok, aron masulbad ang kalisud

KALISUD. Kini ang rason sa kadaghan kong nganong daghan sa mga bata karon ang nag-antus sa kagutom ug malnutrisyon.

Daghan ang naguol nga mahutdan ug pagkaon tungod kay walay igong kuwarta nga ikapalit og mga pagkaon.

Apan sa bag-o lang gipahigayon nga National Nutrition and Food Security Forum nga gitambongan sa mga nagkalain-laing sektor sila niaghat sa komunidad paggamit sa ilang mga likod nataran o mga bakanteng luna aron matabangan ang paghunong sa kagutom ug malnutrisyon sa mga bata.

Nasayran nga 66.9% o kapin katunga sa mga filipino household dunay insakto nga pagkaon samtang 72.7% ang nabalaka sa pagkulang sa pagkaon tungod kay wala silay kuwarta nga ikapalit.

Daghan man gud sa ato nga nagsalig sa mga staple food.

Gipasabot nga atong gamiton ang atong likod nataran diha sa pagpananom og mga utanon o mga lagutmon aron dili kita magutman.

Kay ato ra bang mamatikdan nga kadtong dapit nga anaa ang kadaghan sa mga nagpuyo anaa usab ang labihan ka lisud.

Sa bisan asa nga dapit labi na kining mga slum area, atong makita kong unsa ang inadlaw-adlaw nga kalihokan sa mga nanimuyo diha. Ang uban nagtsimis samtang naghingut-anay, dunay mga nagsugal, nag-inom ug uban pa nga mga walay hinungdan nga ug walay kalambuan nga mga kalihokan.

Kong kanang ilang gipanghimo ila pa nga gitikad sa ilang likod nataran makatabang pa sila dili lamang sa gobiyerno kundili sa ilang kaugalingon. Kong mananom ka diha og utanon, dili kana mopalit ug sustansyado pa nga pagkaon ang imong gilamoy.

Apan moingon man dayon kining mga pilosopo nga 'walay silay likod nataran unsaon man pagtanom.'

Ang Department of Agriculture (DA) nagpakita sa ilang urban gardening program diin kini nagpamatuod nga ang mga kabalayan sa urban areas nga limitado lamang ang lugar mahimo nga makatanom diha sa mga lata o plastic containers.

Molihok gyud kita aron masulbad ang kalisud ug dili nato isalig sa gobiyerno ang tanan. Kinahanglan gyud nga magsugod kanato ang pagpaningkamot alang sa kaarangan sa atong nasud.