Todino: Makalilisang nga Obama

NIADTONG tuig 2004, dihang mikandidato pagka-senador sa Estados Unidos si Barak Obama, daan nang mipadayag siya sa iyang baruganan nga supak sa same-sex marriage kon kining pagminyo sa pareho nga babaye o lalaki.

Sukad siya napili nga presidenti sa America nagpabilin iyang baruganan. Sa miaging semana nausab ang tanan. Pabor na siya sa same-sex marriage apan girespetohan gihapon niya ang matag estado nga motugot o dili sa maong kaminyoon. Sa America man gud dunay mga estado o dapit nga nagtugot sa same-sex marriage.

Unsa may epekto niining baruganan karon ni Obama.

Pipila ka oras human gipagawas ang report nga gisuportahan ni Obama ang same sex marriage, milanog ang tingog sa mga mahuyang ug kining mga lakin-on dili lang sa America apan sa tibuok nawong sa kalibutan.

Nakita niining maong hugpong sa mga tawo ang ilang bag-ong champion. Dili ikalimod gamhanan ang Estados Unidos sa kalibutan. Kon unsa man ang mahimong baruganan sa ilang presidenti dako usab og epekto sa ubang nasod.

Daghan usab ang wala makauyon. Ilang gikondinar ang ulahing baruganan ni Obama labi na kay nagsingabot ang eleksyon sa America.

Kining pag-uyon ni Obama sa same sex marriage nagpakita kon unsa kahuyang ang iyang pagtuo sa iyang relihiyon. Niadtong 2004, atol sa kampaniya pagkasenador, nangugat si Obama nga ang kaminyoon, segun sa iyang pagtuo sa Kristyanismo alang lamang sa lalaki ug babaye. Period.

Tataw nga gikontra karon ni Obama ang simbahan.

Dinhi sa Pilipinas, kanunay nato gisud-ong ang Amerika ug ang halos tanang lihok nato na-impluwensiya sa mga Amerikano. Dili ba kaha kini magnakod si Obama sa ubang lider sa atong gobiyerno?

Angay nato bantayan ang lihok sa atong mga lider nga mopalukapa ug mopahapla sa atong moralidad.

Bisan pa kon moingon si Obama nga personal niya nga position ang pag-uyon sa same sex marriage ug walay labot ang gobiyerno. Apan isip pangulo sa higanti ug gamhanang nasod sa kalibutan, dako og epekto ang iyang baruganan.

Bantayan nato, karon nga nabisto na nga si Obama dili morespeto sa katuyoan sa Ginoo, walay katarungan nga dili niya himuon unya ang uban pang lakang nga makadaot sa simbahan o pagtuo sa mga Kristohanon.

Makalilisang kining baruganan ni Obama kay morag gihagit niya ang labawng makagagahom.