Todino: Dili solusyon ang pagmahal sa sigarilyo

MILUSAD og hugot nga kampaniya ang Department of Health (DOH) batok sa panigarilyo. Karon pa gyod nako namatikdi nga siryoso ang gobiyerno sa pagpakigbatok niini. Dugay na nila kining gilusad nga programa apan wala lay ngipon pasabot nga walay klarong pagpatuman. Gani sa mga bus ug PUJ kaniadto adunay mga drayber ug konduktor nga dili mobadlong sa manigarilyo kay sila mismo mosuyop man sad. Maayo gani karon medyo na-edukar na ug dyotay ang pasahero bahin sa smoking ban sulod sa mga sakyanan.

Karon paningkamotan sa DOH nga mawagtang ang panigarilyo sa mga publikong dapit dinhi sa syudad aron hingpit nga mapatuman ang ordinansa dinhi sa dakbayan. Didto sa dakbayan sa Davao estrikto kaayo ang lokal nga kagamhanan sa no smoking sa mga publikong dapit ang masakpan multa diretso. Ang mga tawo sad mahadlok kay tinud-on man ni Kanhi Mayor Ronald Duterte. Dili sama dinhi sa ato nga walay ngipon kay mismo ang mga opisyal kusog man sad manigarilyo.

Kini nga topiko dugay na nakong giladlad dinhi sa mantalaan apan ambot kaha kon duna bay nakahunahuna sa pag-undang sa pagpanigarilyo. Sa didto pako sa dakbayan sa Sugbo nadistino adunay no smoking program nga gilusad ang among pundok kada Marso magahin mi ug usa ka adlaw aron pagpanghatag ug flyers sa kadalanan among latason ang Osmena Boulevard paingon sa dalan Colon aron pagkampaniya. Ang ubang tawo nga makadawat inay mobasa manigarilyo na hinoon sa among atubangan pagpakita sa ilang pagsupak. Apan karon daghan na nga pundok ang milusad ug kampaniya bahin niini.

Tinuod bitaw nga mora kag mabuang kon moundang sa pagsigarilyo apan ang tambag dili abrupt ang paghunong hinayhinay. Malamposon kon seryoso ka sa imong kaugalingon. Dili kay ikaw ra ang mi-undang daghan na naka-survived sila. Matod sa mga ekspert nga 20 minutos gikan sa paghunong sa sigarilyo mo-us-us ang blood pressure ug monormal ang pulse rate. 8 minutos gikan sa paghunong sa sigarilyo oxygen level sa dugo mobalik sa normal, sa 24 oras, minos ang kahigayonan nga atakihon sa kasingkasing , 48 oras, abilidad sa pagsimhot ug panilaw mo-improve,1 ka tuig duna nay posibilidad nga minos na ang heart attack.

Ang paghunong sa pagpanigarilyo maoy usa ka maayong desisyon sa imong kinabuhi alang kanimo ug sa imong pamilya. Para sa imong kaugalingon

- mobalik ang maayong panglawas layo sa sakit nga kanser , heart attack, stroke, tb etc. sagad sa manigarilyo gi-ubo ubo ug niwang kaayo
- hapsay ang panagway medyo mobata ang pamanit ug hitsura kay makatigulang ang bisyo
- makaminos sa gasto adlaw adlaw
- better sex kay ang pagpanigarilyo maka-impotence
- layo sa peligro ang imong pamilya gikan sa aso o second hand smoking
- kinahanglang ikaw maoy modelo sa pamilya

Hinaot unta nga barugan sa DOH ang ilang kampaniya bahin sa smoking ban , ang pagpasaka sa presyo sa sigarilyo dili maoy husto nga solusyon aron ang mga batan-on dili masugamak sa maong bisyo. Unya ang mga dato kay kinarton man ang paliton kay mas makabarato. Ang maayo unta nga buhaton sa gobiyerno nga wagtangon gyod ang sigarilyo sa nasod. Pero morag gituyo man ni aron makuhakuhaan ang populasyon sa nasod. Dili ba? Dinhi nalang kutob. God bless