Todino: Obispo batok panigarilyo

TULO ka mga obispo, sila si Arturo Bastes sa Sorsogon, Honesto Ongtioco sa Cubao ug Jose Oliveros sa Malolos, mingduso alang sa pagdili pagpanigarilyo sulod o gawas sa lugar sa simbahan, apil na sa mga public plaza.

Ang dakong katarungan nga ilang gikampaniya mao ang bahin sa daotang epekto sa panigarilyo diha sa lawas sa tawo.

Dili pa ulahi ang tanan, mas maayo kining gisugdan na og kampaniya sa kadagkoan sa simbahan. Ug matod sa Obispo sa Caloocan nga si Deogracias Iniguez mas maayo ipatuman na kini sa mga obisyo sa ilang tagsa-tagsa ka mga hurisdiksyon ug dili na magpaabot pa kon mopagawas og direktiba ang Catholic Bishop Conference of the Philippines.

Nasayod na ang tanan, bisan gamayng bata, sa daotang epekto aning panigarilyo. Ang mga sakit resulta sa panigarilyo sama sa kanser maoy numero unong hinungdan karon sa kamatayon sa bisan asang nasod sa kalibutan.

Katingad-an kaayo, nganong karon pa man mangugat kining mga kadagkoan sa simbahan nato. Karon pa ba sila masayod sa daotang epekto sa pagpanigarilyo o kuwang lang sila og igong kaisog pagbadlong sa ilang ginsakopan sa kahadlok nga nawad-an sila og mga panon.

Pero kon tiunay gyud nga concern sa kaluwasan sa tawo kining atong mga obisyo, nasayod sila unsaon pagbadlong ang mga sakop sa simbahan. Unsaon man?

Klaro man diha sa Bibliya nga ang atong “lawas mao ang templo sa Espirituo Santos” [I Corinto 6:19]. Dugang pa, gipalit na kita sa usa ka bili “busa himayaon ninyo ang Dios sa inyong lawas” [I Corinto 6:20]. Karon, kon atong butangan og hilo, kining aso nga makamatay atong lawas, paghimaya ba kana sa Dios?

Kon seryoso ta, dili lang kay idili nato ang pagpanigarilyo sa usa ka dapit. Did-an gyud unta nato sa hingpit ang mga tawo kay sa tinuod wala tay katungod sa paghugawhugaw sa atong lawas kay gilukat na kini didto sa Kalbaryo.

Mao niy dakong hagit karon sa atong simbahan. Unsaon gud ang ubang mga pari manigarilyo man pod.

Wala ta mosaway aning lakang sa tulo ka mga Obispo. Dalaygon kini. Apan mas maayong tinud-on nila ang kampaniya subay sa Kasulatan. Dili nato ihikaw ang kamatuoran. Kon mosunod ta sa lakang ni Kristo, nan dili nato buhaton ang bisyo ni Pilato.

Kining bisyo sa panigarilyo dili lang kini isyu sa panglawas, kon buot tugkaron nato, nakataya dinhi ang atong padulngan sa kataposan natong ginhawa.

Atong paaboton nga bisan dinhi sa atong siyudad, mobarog usab atong mga obisyo ug kaparian batok aning pagpanigarilyo. Iapil nalang usab nang inom, sugal, parehas ra nang tanan.