Todino: Kinsa may mas guilty

ANG kapakyas pagbutyag sa statement of assets, liabilities and net worth [kining kinatibuk-ang balor ug kantidad sa mga kabtangan ug kwarta sa usa ka opisyal] mao karon ang nasentro sa impeachment complaint batok kang Chief Justice Renato Corona.

Kong walay kakulian hukman na sa mga senador si Corona karong Martes.

Ipaka-walay sala ba nila o konbiktohon ba si Corona, bisan asa anang duha nga desisyon magpaabot ta nga dili tanan matagbaw sa resulta unya.

Apan ang dakong hagit nga wala gyud matubag diha sa hukmanan sa mga senador mao kining hagit mismo ni Corona ngadto sa 188 ka mga magbabalaod nga miduso sa impeachment complaint nga mo-waive sila sa ilang bank deposit – nagpasabot tugtan nila ang bangko nga mopakita sa ilang mga deposito.

Angay manubag niini ang atong mga magbabalaod ngadto sa publiko. Kon wala silay gitagoan dili sila magpanuko sa pagpakita sa ilang bank account. Kon nakuha na nimo ang bahandi gikan sa maayong paagi nganong ilimod man nato.

Basi sa ulahing pagsang-at nila sa statement of assets, liabilities and net worth, nagpakita nga ang tanang senador pulos milyonaryo. Kana basi lang sa ilang gibutyag, kumusta kadtong mga deposito sa bangko ug uban pang mga kabtangan nga siguro gipangalan sa laing tawo?

Giuyonan hinuon sa mga senador ug mga kongresista nga niduso sa impeachment complaint ang baruganan ni Corona kabahin sa absolute confidentiality clause sa Foreign Currency Deposit Acts. Nagpasabot uyon sila nga dili mapugos ang depositor sa pagpresentar sa iyang dollar account.

Siyempre, mouyon gyud kining mga magbabalaod kay mismo sila dili komportabli pagtug-an sa ilang mga dollar account.

Kinsa man karoy mas guilty. Nakita nato ang dagan sa impeachment complaint nga samtang giutingkay pag-ayo sa mga senador ang mga kabtangan ug bahandi ni Corona, wala nila limpiyohi ilang tugkaran.

Karong umaabot eleksiyon, ang katawhan na pod maoy mohukom nila.
Kinahanglan gyud iyagyag sa atong mga senador ug mga kongresista ang ilang insaktong kabtangan. Dili ta magminaut ug dili nato tikasan ang gobiyerno.

Ang dakong pangutana karon, mosalig pa kaha ang mga tawo sa atong mga magbabalod nga mismo sila magdumili man sa pag-presentar sa ilang mga bank deposit samtang ilang giutingkay ang bank deposit ni Corona.

Kinsa kadtong walay sala nan kamo maoy unang molabay og bato. Segurado kaha ta nga inosenti ang atong mga senador? Kinsa man kaha karon ang mas sad-an o guilty, si Corona o ang nagpa-impeach niya?