Todino: Dili prioridad ang modernization sa militar

ANG kanunay iplastar niining Department of National Defense pagpangayo og dakong pundo sa Kongreso mao kining program sa modernization sa militar.

Ning bag-o, nangayo sila og P75 bilyones alang sa modernization program sulod sa lima ka tuig.

Gamiton kono ang maong kantidad alang sa 39 ka mga proyekto sa departamento. Lakip na niini ang pagpamalit og kahimanan sa komunikasyon, fighter jet nga gamiton pagbansay-bansay sa mga piloto, kining gitawag nila og closed air support aircraft, long-range patrol aircraft, radar systems ug engineering equipment.

Ang pangutana, giunsa man diay paggamit ang mga pundo kaniadto alang sa modernization program? Kinsa may nakapahimulos sa dagkong kantidad nga giaprobahan sa Kongreso kaniadto? Gikinahanglan ba gyud nato nga sangkapan ang atong military og modernong mga gamit? Nahunong naba kining ‘pabaon’diin ang mga hepe sa armadong kusog hatagan og minilyon ka pesos sa ilang pagretiro sa katungdanan?

Dili ta mosupak nga mopalit og mga modernong gamit ang atong militar. Kana kon makapakita usab unta sila nga takos mogamit sa maong kahimanan. Ang nahitabo gud karon, walay pag-uswag sa performance ang atong mga militar. Kay kon duna pa, kon dili kaminusan nawala na unta kining problema sa mga terorismo ug rebeldi.

Hangtod karon, naa pa gihapon kining presensya sa mga terorista ug mga rebeldi nga kanunay minghasi sa mga inosenti. Ug daghan pang mga kinabui sa mga militar ang nakuha.

Unya ra ba, matingala ka kay ang mga gamit sa atong militar mipaingon man ngadto sa ilang kaaway. Kinsa may nag-supply og armas sa mga terorista ug mga rebeldi? Dugang pa, hangtod karon wala pa gyud mapuhag kining mga private armies. Unsa may gibuhat sa atong mga militar?

Sa atong tan-aw, kon gikinahanglan man gyud sa militar ang kwarta pagpalambo sa ilang gamit, ipakita una nila ang kausaban diha sa ilang kampo, lakip na niini ang paghunong anang mga anomaliya sa panalapi.

Pagkakaron, dili kaayo prioridad ang modernization sa militar bisan pa dunay hulga sa China. Magkinahanglan pa kita og 30 ka tuiga o labaw una nato maseguro ang seguridad sa nasod nga walay pagdependi sa kaalyadong mga nasod sama sa Amerika.