Emata: Gamay lang ang suholan

ANG katilingban sa tibuok kalibutan ginsakpan sa daghan nga katawhan nga nagkupot sa nagka daiya nga klase sa trabaho. Dunay kita mga scientipiko, mga doktor, abogado magtutudlo, tinidor de libro, mga pari, sa militarya, polis ug uban pa. Kining tanan lain-lain ang mga trabaho sumala sa ilang linya kon profesion. Nag timbayayong sila mao nga nahimo ang usa ka lungsodnon katilingban nga dili lamang sa atong dapit kon dili apil na ang ubang nasud.

Lain-lain usab ang kantidad sa ilang suholan. Ang mga taas nga katungdanan nagdawat sa daku nga suholan samtang katong ubos ang klase sa trabaho, ubos usab ang sueldo. Ingon niaana ang hitsura sa suholan sa katawhan. Kadaghanan sa mga nagtrabaho, mga ubos kon kulang ang ilang gadawaton sa kadaku sa ilang gihimo nga trabaho.

Usa sa mga gamay ang sueldo mao ang sa mga sakop sa media. Kadaghanan kanila kulang ang gidawat samtang naghimo sa daku nga responsibilidad. Ako nasayud niini kay taga-media, ako ug dugayng panahon nga nagdawat ako sa gamay nga suholan. Kon itandi sa trabaho, pastilan wala sa amingking ang sueldo. Naa pa kanang grabe ka kuyaw sa trabaho gawas nga lisud kini. Dili tiaw magsulat sa balita, mga komentaryo ug uban pa.

Sukad pa niadto gamay gayud ang sueldo poreso kadaghanan sa taga-media dili gani makapalit sa balay para puyanan. Dili makapalit sa sakyanan. Ang pamilya nagkagidlay. Mga bata dili maka-escuela sa kolehiyo tungod kay walay ibayad sa escuelahan. Kadaghanan sa mga kabataan malugos na sa pagtrabaho bisan dili pa angayan.

Para kanako, uyon man ako nga gamay lang atong sueldo kon makita nato nga ang atong employer nagkalisud-lisud usab. Ang dili maayo kay makita man nato nga atong amo miburot na ang negosyo apan nagpabilin ang mga tripulantes nga ubos ang suholan. Murag walay kaangayan kon atong sudongon pag-ayo ang sueldo sa mga tawo nga gipaningot sa trabaho apan ubos ang suholan.

Hinaut ang kagamhanan molihok niini ug mohimo sa pagpataas sa sueldo sa tawo. Kinahanglan sueldo nga makalipay usab sa nagtrabaho. Lantawon nila ang kaugmaon sa mga kabataan nga kini sila makaescuela gayud aron mandagko nga dunay edukasyon. Niini nga paagi ang atong katilingban ugma damlag maanindot nga sudongon ug malikayan ang mga kolokoy kon ignorante nga mga Pilipino.