Todino: Zero casualty | SunStar

Todino: Zero casualty

Time to read
1 minute
Read so far

Todino: Zero casualty

Thursday, December 29, 2016

CAGAYAN DE ORO. Patay ang usa ka construction worker human gipusil wala mailang suspek sulod sa gitrabahoan niini sa Barangay Balulang, dakbayan sa Cagayan de Oro. (Hulagway kuha ni Aries)

UNSA may kahulogan niining natala nga zero casualty sa firecracker ang Northern Mindanao lakip niini ang siyudad sa Cagayan de Oro?

Basi sa report sa Department of Health (DOH), walay nahiagom og kadaot sa lawas gumikan sa paboto hangtod niadtong Lunes, Desiyembre 26.

Ika-duhang tuig na kini nga walay nasamdan sa pagpaboto atol sa pagsaulog sa Pasko.

Ang dakong katarungan niini, matod ni DOH Education Promotion Officer 3 Nur Ian Caridad, tungod sa epektibo ug sobsob nga education campaign bahin sa delikadong epekto sa paggamit og firecracker, ug ang ulahing paghatag og permit sa mga firecracker vendors.

Importanti kaayo kining impormasiyon bahin sa zero casualty tungod kay pwede kining himoon natong barometro pagsaulog sa Pasko sa umaabot nga katuigan nga dili maggamit og firecracker.

Dako og epekto sa panglawas sa tawo ang firecracker labi kon sayop ang paggamit.

Ug wala mausik ang panahon nga gigogol sa DOH sa ilang education campaign kay nagpakita kini og positibong resulta.

Angay usab ipasantop sa DOH ngadto sa komunidad nga dunay laing alternatibo sa firecracker.

Dunay electronic firecracker karon nga mas sipa ug makabungog og boto kon itandi sa tinuod nga firecracker.

Alang niadtong dili gayud makapugong pagsugat sa Pasko ug Bag-ong Tuig nga dunay pagsabasaba ug paboto, kining electronic firecracker maoy alang kanila kay mas luwas ug dili peligro.

Kon subayon nato sa miaging katuigan, ang mga negosyanti man maoy nagpasikat aning mga firecracker.

Sa karaang panahon, mahadlok gayud mogamit ang mga tawo og paboto. Hangtod nga nagpasiugda ang mga negosyanti pagpakatap aning mga firecracker sa walay pagtan-aw sa kapeligro ug daotang resulta.

Ang labing epektibo gayud nga paagi aron malikayan kining kadaot sa firecracker maoy ra gayud ang hingpit nga pagdili niini.

Nasayod ta, bisan niadtong tiggamitan og firecracker ug niadtong mahadlok mogamit, dili sila gusto nga mahiagom og kadaot sa paboto.

Walay gusto nga maputlan og tudlo, o masamdan sa lawas gumikan sa paboto.

Ang bugtong sulosyiyon ani mao ra gayud ang paglikay sa firecracker.

Hinaot saulogon nato ang Bag-ong Tuig pinaagi sa pagsugat niini uban sa pagmaya, kalipay, kadaseg, ug dili sa firecracker.

Gipatik sa mantalaang Superbalita Cagayan de Oro Disyembre 30, 2016.

View Comments