Todino: Unsa ning #LeniLeaks? | Sun.Star

Todino: Unsa ning #LeniLeaks?

Time to read
1 minute
Read so far

Todino: Unsa ning #LeniLeaks?

Monday, January 09, 2017

SAMTANG gisawsawan na pag-ayo sa social media kining #LeniLeaks way kibo ang mainstream media sa maong isyu. Ngaho kaha?

Pipila ka mga supporter ni Presidente Rodrigo Duterte nakabangal aning mga mensahi gikan sa YahooGroups sa Global Filipino Diaspora Council.

Nahisgutan sa ilang panagbayloay og mensahi ang tinguha pagpalagpot ni Duterte sa Malacañang.

Dunay mga tawo nga nalambigit sa maong plano lakip na niini ang bilyonaryong Fil-Am nga abogado nga si Loida Nicolas Lewis.

Nautingkayan usab ang kalihukan ni Bise Presidente Leni Robredo nga nitrabaho batok sa administrasyon ni Duterte. Wala pa gayud mopatin-aw si Robredo bahin niini.

Dili nato mabasol kon ingon ana ka desperado ang grupo ni kanhi Presidente Aquino, kanunay nangita og pamaagi aron mapakaulawan ug hangtod mapalagpot sa gahom si Duterte.

Pero, ang ilang inisog nga pamaagi wala gyud mabutang sa lugar.

Dili man gud pwede nato laktoron nalang ang sistema aron ipalagpot sa Malacañang ang presidente.

Unsa may ilang basihanan?

Kon gusto sila ug lig-on nga suporta sa ilang kawsa, unahon nila pag-awhag ang yanong lungsoranon pagpakig-away sa administrasyon.

Apan, kana mahimo lamang nila kon wala na matagbaw ang katawhan sa programa o performance ni Duterte.

Ang ilang gihimo karon, nagsugod sila sa taas, gipalihok nila ang adonahan nga mga tigpaluyo sa America, mga kakunsabo sa media, simbahan, estudyante aron paglusad og lapad nga lihok protesta.

Tingali gipundohan ni Lewis ug kaubanan ug minilyon ka pesos ang ilang mga kalihukan batok ni Duterte.

Wala man mosaril kay bug-os pa ang pagtuo sa mayoriya sa katawhan sa katakos sa presidente.

Taliwa niining mga pagpangdaot tumong sa Malacañ0ang, nagpadayon sa pagtrabaho si Duterte alang sa kaayohan sa tanan, apil na ang iyang mga kaatbang sa politika.

Ang kalamposan ni Duterte wala gayud hatagi og gibug-aton sa grupo ni Lewis nga nagduso sa pagpalagpot ni Duterte aron makapuli sa pwesto si Robredo.

Usa ka panahon, na-interbyu nako mismo kini si Lewis dihang miduaw sa Saipan aron tabangan ang mga Overseas Filipino Workers sa ilang mga problema.

Dunay grupo si Lewis nga gitawag og US Pinoys for Good Governance (USP4GG) ug daghan tuod ilang nahatagan og mga legal advice.

Apan, nasayod ta nga dunay gipahipi nga motibo sa ilang pagtunol og assistance sa mga OFW. Atol sa eleksiyon, dayag kaayo ang USP4GG nga nagkampaniya ni Mar Roxas.

Sa gihimo karon ni Lewis, tingali duna pay mas lawm nga isyu niini ug basin baya gipaluyohan kini sa dagkong tawo sa Estados Unidos nga wa mahimuot sa baruganan karon ni Duterte pagpakigsuod sa China ug Russia.

Hulaton nato sa umaabot nga adlaw, human niining pagpakahilom sa Malacañang, dunay mas dako ug makabungog unya nga hilok nga himoon si Duterte batok niining mga tawo nga mitraydor sa Pilipinas. Ug gani, sa pasiuna gisingit na sa Malacañang isyu pagdeposito ug minilyon nga bulawan sa Malaysia ni kanhi Presidente Aquino ug kaubanan.

Gipatik sa mantalaang Superbalita Cagayan de Oro Enero 10, 2017.

View Comments