Todino: Gipangrelibohan | SunStar

Todino: Gipangrelibohan

Time to read
1 minute
Read so far

Todino: Gipangrelibohan

Tuesday, September 19, 2017

GIPANGRELIBOHAN ang 1,200 ka mga pulis sa Caloocan City. Kini tungod sa pagkalambigit sa pipila kanila sa pagpatay ni Kian Delos Santos ug duha pa ka mga batan-on, ug sa ulahing pagtulis sa usa ka panimay atol sa pagpangronda kabahin sa drugas.

Segurado nga dili tanan ang nangalambigit sa mga binuang o kahiwian. Napagan lamang ang uban.

Daan nang mipasidaan si Presidenti Rodrigo Duterte kon dunay magbinuang sa grupo ang tanang sakop maduhig gayud.

Kahinumdom pa mo dihang gipang-assign ni Duterte ang 219 ka salawayon nga mga pulis niadtong Pebrero?

Walay kalainan kini sa nahitabo karon sa Caloocan City.

Tungason pa kaayo ang paglimpiyo diha sa hanay sa PNP tungod kay nakagamot na pag-ayo kining binuang sa dugay nang panahon.

Busa dili gyud ikatingala nato, kon matag karon o unya, mabalitaan nalang nato nga laing pulis na usab ang nalambigit sa hinanggaw nga kalihukan.

Ubos karon sa liderato ni Philippine National Police (PNP) Chief Ronald “Bato” dela Rosa makapaabot ta og daghang kausaban sa kapulisan.

Sukad sa iyang paglingkod sa katungdanan, daghang mga pulis nga mipalag sa iyang polisiya apan daghan sab ang nahimuot. Kana, dependi sa unsang interest nila nga naapektohan.

Hinuon sa kinatibuk-an, dunay maayo direksiyon ang administrasiyon karon sa kapulisan bisan naa gihapon kining mga eskalawag nga mga sakop.

Ang important ug angay kab-oton sa PNP mao kining pagpabalik sa pagsalig sa katawhan diha nila.

Sa dekada 60, ang mga tawo nga buhi pa karon, malipayon nga mopahat sa ilang kasinatian sa kapulisan.

Matod nila, dako ilang pagrespeto ug pagtahod sa kapulisan. Ug giisip nila ang kapulisan kaniadto nga maoy manalipud kanila gikan sa daotang mga tawo.

Nausab kining panglantaw nato sa kapulisan tungod sa mga badlongon nga sakop sa PNP nga mao mismo ang nagbuhat og kremin sa atong palibot.

Mahibalik pa kaha kanang respeto ug pagtahod nato sa kapulisan? Gibati mo ba nga luwas ka kon dunay pulis o bation mo ang tumang kahadlok kon duolon ka og pulis.

Unta, human kini relibohan ang mga badlongon nga pulis, imbestigahan, ug mamatud-an nga sad-an, dili lang kay palagpoton sa katungdanan, pasakaan gyud og kaso.

Gipatik sa mantalaang Superbalita Cagayan de Oro Septembre 20, 2017.

View Comments