Todino: Bangkarota sa pamaagi | SunStar

Todino: Bangkarota sa pamaagi

Time to read
1 minute
Read so far

Todino: Bangkarota sa pamaagi

Monday, October 16, 2017

GIKINAHANGLAN ba gyud molusad ta og duha ka adlaw nga transport strike aron mapadayag ang pagsupak sa planong modernisasiyon sa transportasiyon.

Kining gihimo sa Solidarity of Transport Alliance in Northern Mindanao-Pinagkaisang Samahan ng mga Tsuper at Operator Nationwide (Starex-Piston) nagpakita lang unsa ka bangkaruta ilang grupo sa pamaagi aron mapadangat unta ilang yango-ngo ngadto sa gobiyerno.

Ngano man diay og mosulat ta ngadto sa Department of Transportation o sa Land Transportation and Regulatory Board aron matubag usab nila ang kabalaka sa mga drayber.

Wa ko kakita og lig-ong argumento sa pamahayag ni Ringo Lago, ang secretary-general sa Starex-Piston nga ang lakang modernisasiyon sa transportasiyon maoy paghikaw og panginabuhian sa mga drayber ug operator.

Dili kuno siya supak sa modernisasiyon apan unahon unta sa gobiyerno pagsulbad ang nagkagusbat nga sistema sa transportasiyon.
Wa ba diay nakita si Lago ang mga proyekto sa gobiyerno karon pagpalambo sa transportasiyon.

Ang nakadaot gud aning ‘walhong’ grupo kay bisan unsa ka maayo sa programa sa gobiyerno, ila gyud na nga supakon.

Gusto nila gawngan kanunay ilang mga sakop ug hiloan sa sayop nga mga pangatarungan aron magdumot kini sa gobiyerno.

Klarohon nato, gipirmahan baya sa Department of Transportation ang Omnibus Franchising Guidelines nga magsilbing tamdanan alang sa modernisasiyon sa mga public utility jeepney o PUJ.

Tinuod na, ang programa sa modernisasiyon nagpasabot usab sa pagwagtang aning mga gubaon na kaayo nga mga sakyanan.

Apan, wala kana magpasabot nga kuhaan sa ilang trabaho ang mga drayber.

Dunay ipagawas nga loan o pahuwam ang gobiyerno ngadto sa mga drayber og operator aron makapahimus sila niining modernong mga jeepney.

Kon gusto ni Lago nga magpabilin ang mga drayber pagmaniho sa gubaon ug karaan nga mga PUJ, nan, wa tay mahimo sa kalimitado niya og pangandoy.

Apan, timan-an nato nga nilibo ka mga commuters ang mabulahan aning modernisasiyon sa transportasiyon.

Unta, kon mangulo ta og pundok, tan-awon nato ang kinatibuk-ang benepisyo sa atong mga aksiyon kon nakatabang ba kini sa grupo lang o sa kadaghanan.

Dili gyud ta makakita og asenso kon nuntan nato kanunay kining mga baruganan sa mga walhong pundok kay dili na kaayohan sa tanan ilang gilantaw.

Sunod bitaw, kon magsupak-supak ugaling ta, ipresentar pud usab unta inyong plano o sulosiyon sa problema. Kay basin pa mas maayo pa na sa modernisasiyon sa transportasiyon.

Unsa man inyong plano be. Naa ba? Wala man gani moy programa pag-minternar sa mga PUJ sa inyong miyembro aron presentabli ug luwas sa aksidenti ilang mga sakyanan.

Sa wala pa ang PUJ, unsa may sakyanan sa publiko? Nahibaw ba kaha ani si Lago.

Nganong di man mobalik og gamit sa tartanilya o karomata o magkabayo nalang kining mga sakop sa Starex-Piston.

Maayo nalang kay dili tanang drayber nagpailad aning walhong grupo.

Gipatik sa mantalaang Superbalita Cagayan de Oro Oktubre 17, 2017.

View Comments