Todino: Way panawagan sa mga drug lord? | SunStar

Todino: Way panawagan sa mga drug lord?

Time to read
1 minute
Read so far

Todino: Way panawagan sa mga drug lord?

Monday, November 06, 2017

NANAWAGAN ang Catholic Bishops Conference of the Philippine nga undangon na kining pagpangpatay sa kampaniya sa ginadiling drugas.

Sa gipasiugdahan nga misa sa Our Lady of Edsa Shrine ug prosesiyon sa People Power Monument sa miaging adlaw, ilang giawhag ang kapolisan ug militar nga hunongon na kining mga bayolenti.

Tinuod na, dunay mga insidenti sa pagpangpatay nga hinimoan sa awtoridad, labi na atol sa operasiyon diin nagpakita og pagsukol ang ilang target.

Apan, dili tanang mga kaso sa pagpatay, hinimoan sa militar o kapolisan.

Tanan nagkauyon sa panawagan “Heal our Land.” Kinsa bay di gusto og kalinaw gud.

Gani, sa iyang homily, si Lingayen-Dagupan Archbishop Socrates Villegas nga mao usab ang presidenti sa CBCP, miingon “kon dili maundang kining pagpangpatay adunay silot nga ipahamtang sa nasod nga nag tugot sa pagpatay sa kaugalingong katawhan niini.”

Nganong ipunting man ni Villegas ang panawagan ngadto sa administrasiyon sa gobiyerno.

Unsa bay tino nga rason nganong dunay mga tawo nga gipang-ihaw?

Programa ba kana sa gobiyerno ang pagpatay og mga tawo?

Moabiba pa tingali ang katawhan kon manawagan si Villegas sa mga drug lord nga undangon na ilang negosyo ug mobalik na ngadto sa pag-alagad sa Dios.

Sukad wa pa gayud ta makabati nga nag-aghat si Villegas ug uban pang mga Obispo ngadto sa mga drug lords, drug smuggler, drug user, drug pusher, drug protector nga hunongon na ilang kabuang. Ngano kaha?

Kon moundang kining mga tawo sa ilang kalambigitan sa pagkatap sa drugas, segurado ta moundang o mominus na kining pagpang-ihaw og tawo.

Daghang kahigayonan ug panahon nga mahimo sa mga pari o obispo pag-awhag sa mga tawo nga nalambigit sa drugas pagbag-o sa ilang dalan.

Bisan diha sa ilang misa ug mga panagtigum, puwede sila manawagan.

Apan, inay manawagan sa mga drug lord nga putlon na nila ilang pagpakasala, mas na-focus man hinoon ilang pagsaway ngadto sa gobiyerno nga naningkamot pagsulbad sa problema sa drugas.

Unsa ba gyud inyong baruganan? Gusto mo og kalinaw o kagubot? Lahi man gud ang inyong mga lihok wa mahiuyon sa inyong gipangyawit.

Walay mga rali, protesta ug bisan pag-ihaw aning mga drug pusher o user nga makapaundang sa problema kon dili nato unahon pagputol ang tinubdan sa suliran.

Ambot nagbasa ba sa ilang Bibliya kining mga pari o obispo. Unsa ba ang makapabag-o sa tawo nga makasasala sama niining nangalambigit sa drugas ug uban pang mga kremin.

Palihug kuno bi, iapil sa inyong misa nga diha lamang ni Kristo mabatnan nato ang pagbag-o sa kaugalingon.

Kon kita dunay pagtuo ni Kristo tungod sa iyang grasya nga gitanyag pinaagi sa pagpakamatay sa krus aron pagsagop sa silot nga alang unta nato nga mga makasasala, nan, makita ang pagka-usab diha sa atong kaugalingon gikan sa pagkamasalaypon ngadto na sa pagkamatarong.

Kay diha sa pagtuo ni Kristo sa iyang kaluwasan malipayon kitang mosunod sa iyang dalan, moundang na kita pagsubay sa atong dalan sa pagpakasala.

Umua makita na diha nato ang bunga sa espiritu sa atong kinabuhi.

Galacia 5:22,23 “Apan ang bunga sa Espiritu moa kini: gugma, kalipay, pakigdait, pagkamapailubon, pagkamahinuklogon, pagkaayo, pagkamatinumanon pagkaahop, pagpugong sa kaugalingon.

Gipatik sa mantalaang Superbalita Cagayan de Oro Nobyembre 07, 2017.

View Comments