Todino: Kinsa ang nabulahan | SunStar

Todino: Kinsa ang nabulahan

Time to read
1 minute
Read so far

Todino: Kinsa ang nabulahan

Friday, December 08, 2017

GIREKOMENDAR sa World Health Organization ang paggamit sa vaccine nga Dengvaxia.

Ang miaging administrasiyon ni Presidenti Noynoy Aquino nigahin og P3.5 bilyones pagpalit sa maong bakuna.

Gisugdan pag-implementar sa Department of Health ngadto sa kapin sa 700,000 ka mga bata sa tunghaan.

Gipadayon sa administrasiyon ni Rody Duterte ang programa sa DOH kay lagi alang kini sa kaayohan pagsumpo sa dengue.

Nasuta karon ang daotang epekto sa Dengvaxia ngadto sa mga bata nga nabakunahan.

Karon, kinsa ba ang angay basolon niining pagtumaw sa krisis sa panglawas nga nakaepekto na sa nilibo ka mga kabataan.

Gipatuman sa administrasiyon ni Aquino ang maong pagpamakuna taliwa sa kamatuan nga way tinong ebedensiya nga luwas ang maong bakuna ngadto sa tawo.

Ang ulahing pagsusi nagpakita lang nga epektibo ang Dengvaxia ngadto sa tawo nga natakboyan na og dengue apan niadtong wala pa mosangpot kini sa dili maayong resulta sama sa hemorrhagic fever diin ang virus moatake sa imong internal organ. Makuyaw!

Sa laktod nasabot nato nga kwestiyonabli kining maong klase sa bakuna apan gituman ni Aquino ug gipadayon sa administrasiyon ni Duterte.

Mabalik pa ba nato ang kahimsog sa kabataan nga nabakunahan? Mura ba og giekspermentohan lang ang mga bata mini.

Ang pagpatawag og imbesgitasiyon maoy lakang nga angay gihimo sa dali nga panahon. Ug ipahunong kining pagpamakuna ug susihon kadtong mga bata nga nabakuhana aron mahatagan gilayon sila og pagtagad.

Ambot kon nasayod ba atong mga opisyal sa gobiyerno nga daghan kaayong kwesiyonabli nga pamakuna nga giladlad didto sa Estados Unidos.

Sa mga tunghaan sa Amerika gipatuman gyud nila ang pagbakuna sa ilang estudyanti. Ang resulta mao nga dunay uban nga nasugamak sa daotang epekto. Bisan sa mga inahan nga nagmabdos, gipabakunahan usab nila. Ang resulta mao nga dunay mga kabataan nga natawo nga dili normal.

Kon nasayod lang unta ang kadaghanan nga atong lawas dunay katakos sa pagsumpo sa mga sakit dili na unta kita mosagop pa niining mga tambal o bakuna.

Wala magkuwang ang Dios sa pagsangkap sa tawo nga iyang gimugna og mga panalipod sa lawas batok sa mga sakit.

Nasayod ta nga kining mga pharmaceutical companies o tighimog mga medisina ug tambal wala kana sila maghimo og tambal aron mamaayo ang sakit. Kon buot nila ayohon ang sakit, mahunong ilang negosyo.

Daghang mga pagtuon nga kining mga tambal sa pharmaceutical companies inay moayo sa sakit mopasamot hinuon kini ug momugna pa og laing mga sakit. Ug mao na ang gusto sa mga negosyanti.

Kon daghan ang magkasakit, bibo ang mga pharmaceutical companies pag-promote sa ilang mga tambal. Ug moalegre ang gobiyerno paggahin og minilyon ka pesos pagpalit og mga tambal. Ug kay daghan man ang nakatumar o nabakuhana, mas mokuyanap ang mga daotang side effect ug mas modaghan pa ang paggawas sa laing mga sakit.

Kinsa man ang nabulahan?

Gipatik sa mantalaang Superbalita Cagayan de Oro Disyembre 08, 2017.

View Comments