Todiño: Unsay hinungdan sa mga sakit | SunStar

Todiño: Unsay hinungdan sa mga sakit

Time to read
2 minutes
Read so far

Todiño: Unsay hinungdan sa mga sakit

Monday, February 05, 2018

MOTUO ba mo nga atong lawas gi-desinyo kini nga mopaalim sa iyang kaugalingon kon duna tay bation?

Apan, nganong daghang mga tawo karon dunay balatian. Nagkadaiyang sakit gikan sa gamay pang bata ngadto na sa tigulang.
Wala ba kaha masayop ang kadaghanan sa pagtambal sa ilang sakit o nitumaw kining mga balatian gumikan sa matang sa akong pagkinabuhi.

Basi sa pagtuon, kining atong lawas puno sa selyula o cell. Matag karon ug unya mamatay kining cell apan dunay bag-ong cell nga mobanos.

Pananglit, sa atong mata, matag duha ka adlaw dunay bag-ong cell nga moilis sa nadugta nga cell. Sa upang parti sa lawas, nagdependi, dunay pag-ilis sa cell matag tulo ka adlaw, dunay upat o usa ka semana.

Apan, importanti nga himsog kining parti sa lawas nga mogama sa bag-ong mga selyula. Ngano man? Kon dili mailisan ang namatay nga cell, pananglit diha sa imong mata, nan, maapektohan ang kahimsong sa imong panan-aw.

Diha sa atong selyula o cell naa ang DNA o kining gitawag nila og kodego sa kinatibuk-ang desinyo sa atong pagkatawo – sa laktod mao kini ang blueprint kon diin masubay nato ang tanang detalyi sa atong pagkatawo o kinatibuk-ang bahin sa lawas gikan sa labing gamay nga selyula ngadto na sa tanang parti sa lawas.

Unsa may makapahimsog sa selyula? Basi sa pagtuon, kining mineralis nga makuha nato sa pagkaon mao kana ang usa sa dakong tinubdan aron paspas ug malahutayon ang paggama og bag-o nga selyula.

Apan, tungod sa matang sa pagkaon nga gibutang nato sa lawas, apektado kaayo ang paggama og selyula.

Pananglit, kining mga pagkaon nga daghan og asukar, mga tam-is nga pagkaon nga gisagolan og mga additives ug uban pang mga kemikal.

Tungod niining asukar o asukal, 92 porsiento sa minerales sa atong lawas ang mawala. Kon sobsob ang pagkunsomo sa pagkaon nga puno sa asukal, nan, peligro nga mahurot ang minerales sa lawas ug moresulta kana sa kakuwang sa paggama og bag-ong mga cell.

Ug tungod kay dili man mahulipan kadtong mga patay nga selyula o cell, inanay nga moluya, molawos ang nagkadaiyang parti sa atong kalawasan ug wala nay igong kusog nga modepensa sa mga kagaw.

Ang bugtong solusiyon niining tanan mao ra gyud ang pagkaon og presko ug luwas sa kemikal nga mga utanon ug prutas kay kining matang sa pagkaon puno sa minerales.

Kon buot, mao kini ang matang sa pagkaon nga gihatag sa Ginoo sa atong unang ginikanan didto sa tanaman sa Eden.

Pero, ang tawo masupilon magbuot kon unsa iyang gusto kan-on basta matagbaw lang iyang ‘dila’ apan nasakripisyo ang lawas.

Busa bisan unsa pang programa ipatuman sa gobiyerno aron mamahimsog ang katawhan, dili kana mosalir hangtod nga kita mismo mopili sa insakto nga pagkaon nga atong ikonsumo.

Pasalamat ta aning gipasiugdahan nga farmers’ market sa gobiyerno sa Misamis Oriental, pinaagi niini basin daghan ang mag-usab sa ilang lifestyle.

Samtang maghunahuna ta kon bag-ohon nato atong lifestyle, pwede mogamit sab ta aning extra virgin rosehip oil.

Mao ni ang matang sa oil nga gisagol sa mga cream ug lotion aron mahimsog ang panit ug mapugngan ang dali nga pagkunot. Kaon na og prutas, utan ug haplas dayon niining rosehip oil aron magpabilin nga himsog ug batan-on.

Gipatik sa mantalaang Superbalita Cagayan de Oro Pebrero 06, 2018.

View Comments