Di diay ephedrine nasakmit sa PDEA

GIBUHIAN na sa Philippine Drug Enforcement Agency (PDEA) ang duha ka mga Chinese national human migawas ang resulta sa laboratoryo nga negatibo sa dangerous drugs ang nakuha nga tulo ka kilong powder nga gituohang ephedrine.

Samtang posebling ang atubangon niini mao na lang ang kaso nga kalapasan sa Anti Money Laundering Act sanglit nagdala man og $20,000 kay ang gitugot sa balaod hangtod lang sa $10,000 nga mahimong madala sulod sa nasud.

Niadtong Miyerkules sa buntag, sila si Xiuyu Tan ug Iek Man Wong gi-hold sa buhatan sa Bureau of Customs sa Mactan Cebu International Airport Authority (MCIAA) human makuha ang tulo ka kilong powder nga gituohang ephedrine base sa ilang initial nga pakiusi.

Samtang ang duha ka mga K-9 Dogs nipakita usab og timailhan nga drugas ang ilang nakuha gikan sa duha ka mga Insek.

Ang mga powder gipadala sa ulohang buhatan sa PDEA aron ipahigayon ang confirmatory test ug kagahapon sa buntag nigawas nga negatibo.

Si Adrian Alvarino, ang regional director sa PDEA-7, niingon nga wa silay mahimo gawas sa pagbuhi sa duha ug ilang gi-turn over ngadto sa buhatan sa BoC.

Matod ni Alvarino nga posebling nasayop lang ang duha ka mga iro nga maoy unang nisimhot sa maong powder.