Mga pulis diriyot mag-engkuwentro

OPISYAL sa Port Police ug mga sakop sa Cebu City Police Office (CCPO) diriyot magkaengkwentro sa pagtubag sa alarma sa usa ka kagubot sa Sityo Silangan 2, Brgy. Tejero, dakbayan sa Sugbo.

Nilanat og dul-an sa usa ka ang “standoff” ug ang katawhan sa dapit ang nangaratol.

Ang mga pulis ningtubag sa alarma dihang gipusil si Fredibert Fulache, 23, pasado alas 3 sa kaadlawon sa usa sa duha ka mga opisyal nga port police.

Si Fulache samdan sa wala ng bukton.

Ang mga suspek giilang mao sila si Port Police Inspector Bernard Macoto ug Port Police Inspector Edward Catamco ug mga security guard.

Sa pasiuna nga imbestigasyon nga gihimo nila ni PO3 Geoffrey Gutual, PO3 Julius Mabunay, PO2 Cristobal Geronimo ug PO2 Lou Pagara sa homicide section nagbutyag nga nagduwa og billiard ang biktima uban sa iyang mga silingan sa dihang ning-abot ang mga suspek.

Ilang gisita ang mga nagduwa ug gipangutana kon si kinsa ang nilabni sa alahas ug pitaka sa asawa ni Macoto.

Nanghimakak ang biktima uban sa mga kauban nga wa sila mahibawo apan gituok ang biktima hinungdan nga ninglaban ang mga lumolupyo ug nahitabo ang karambola.

Na-alarma ang mga tawo sa dapit hangtod nga nahitabo ang pagpamato ug misunod ang boto sa armas de fuego.

Nanagan ang mga suspek palayo, apan ang hitabo naalarma sa kapolisan sa Mobile Patrol Group (MPG) nga nipadala sa car 016, 008 ug car 020.

Sila si PO2 Erwin Pequiro ug PO2 Edwin Mayuela sa car 016 niingon nga maoy ilang naabtan ang mga suspek nga naghupot na sa ilang mga armas de fuego.

“Kita sila namo. Wa lang mi mopugos og duol kay nakaporma na silang daan nga nag-atubang namo. Maorag makigpinusilay,” matod sa usa sa mga pulis.

Nipaila sila nga pulis nga sakop sa MPD ug giawhag ang mga suspek sa pagtahan sa ilang kaugalingon.

Apan nagdumili sila si Macoto ug Catamco hangtod nga nanawag og back-up sila si Pequero ug Mayuela hinungdan nga nangabot ang laing mga sakyanan sa MPD.

Human makita sa mga Port Police nga daghan na ang kapolisan, una pa sila ningtahan sa ilang kaugalingon ug wa magdugay migawas ang biktima nga samaron ug nitumbok kang Macoto nga maoy namusil.

Sila si Macoto ug Catamco niingon nga igo lang sila nga nagpasalba human sila gibato ug gikulata sa pondok sa mga batan-on lakip na ang biktima.

Si Macoto niingon nga nangutana lang sila sa mga batan-on kon si kinsa ang niigo sa iyang asawa.

Apan nasuko si Fulache ug gikalitan siya og sumbag hangtud nga nahitabo ang lamok-lamok.

Sa dihang ilang nakita nga nanggawas ang ubang mga silingan, sila nanagan ug gisundan og bato.

Nasakmit sa kapulisan ang 9mm pistol ni Macoto uban sa 13 ka mga bala gikan sa magazine.

Si Fulache kinsa gidala sa Cebu City Medical Center (CCMC) desididong mokiha sa duha ka mga opisyal.

Matod sa taho sa GMA-7 Balitang Bisdak nga hubog ang mga suspek atol sa hitabo.