Menor nga `gigamit ‘ sa bayot nahadlok na STD

NABALAKA ang usa sa lima ka batan-ong lalake nga gipahimuslan sa usa ka bayot didto sa dakbayan sa Naga ang nasakit og sexually transmitted disease (STD).

Kini tungod kay nakasinati ang maong batan-on sa pagpanakit sa iyang kinatawo panahon nga mangihi.

Nagtuo ang batan-on nga resulta kini sa pagpugos sa bayot (ngalan gitago) sa pagpakighilawas kaniya.

Ang lima ka mga batan-on nga taga sityo Panas, Barangay Balirong nipasangil nga ang silingan nila nga bayot nga kapin na sa 30 ang panuigon, nagpulipuli sa pagpahimulos kanila.

Ang mga batan-on nagpanuigon og 14, 15, duha ang 16 ug 17, pulos manag-agaw.

Taga Ormoc ang maong bayot ug naabot sa Balirong tungod kay uyab man kini sa lain nilang ig-agaw nga ila rang silingan.

Nabulgar ang gihimo sa silingan ngadto sa mga batan-on dihang ang barangay health worker nga si Felipa Laporque ilang gisumbongan.

Nahadlok ang mga batan-on tungod kay gihulga sila sa bayot nga ipangkiha tungod sa daghan nang mga tabitabi.

“Niingon man na siya (ang bayot) nga di siya mahadlok nga among ikiha kay naa daw siyay daghang abugado. Kami kuno ang iyang ipangkiha,” matod sa usa sa mga biktima.

Ang City Social Welfare Office ug ang kapulisan sa Naga niandam na sa kasong sexual abuse in relation to R.A 7610 (child abuse).