Pagpa-uniform estriktuhon

GIHATAGAN og igong panahon sa Land Transportation Franchising and Regulatory Board sa Central Visayas ang mga operators sa mga public utility vehicles nga mapatuman ang kamanduan labot sa pagpasul-ob og uniporme sa mga drayber sa mga publikong sakyanan.

Matod ni Ahmed Cuizon, regional director sa LTFRB-7, nga sa pagkakaron di pa estrikto ang ilang buhatan sa pagdakop og mga PUV drivers nga di magsul-ob og uniporme basi sa nalatid sa kamanduan ni LTFRB chairman Nelson Laluces nga bag-ohay lang ni-resign sa puwesto.

Apan sobsob ang kampanya sa LTFRB-7 pagpasidaan sa mga PUV driver labi na ang mga taxi driver nga magsul-ob na og uniporme sa panahon nga mamasada.

Sa giluwatan nga memorandum ni Laluces, kini nagmando nga magsul-ob og polo shirt o T-shirt nga may kwelyo nga light blue ang mga drayber sa dyip pasaheroan.

Samtang ang mga drayber sa bus, magsul-ob gihapon og puti nga polo shirt o T-shirt nga adunay kwelyo.

Ang mga drayber sa taxi nga kasamtangan nagsul-ob og puti nga polo shirt, magsul-ob na og pula nga uniporme.

Samtang ang mga drayber sa mga shuttle services, school services ug tourist transport service magsul-ob og yellow nga polo shirt.