Magkinihaay gyud

KASONG kriminal ug administratiba ang ipasaka sa mga mag-uuma batok sa kapulisan tungod sa riot dihang gipatuman ang mando sa korte labot sa bangi sa yuta sa Barangay Bonbon, lungsod sa Aloguinsan.

Apan ang kapulisan nag-andam na sab sa ilang mga ebidensya aron pagpasaka og daghang mga kaso batok sa mga mag-uuma ug mga sakop sa militanteng pundok nga ilang gikarambola niadtong Lunes.

Inabagan sa Central Visayas Farmers Development (Fardec), Karapatan, Bayan Muna, Anakpawis, ug ubang progresibong pundok, pasakaan sa mga mag-uuma og kasong arbitrary detention, serious physical injuries, unlawful arrest ug uban pang mga kaso ang kapulisan nga nalambigit sa maong kagubot.

Samtang ang kasong administratiba ipasaka sa Visayas Ombudsman karong adlawa.

Gawas niini, magpakitabang usab ang mga mag-uuma sa Commission on Human Rights (CHR), Department of Interior and Local Government (DILG), Department of Social Welfare and Development (DSWD) ug ubang hingtungdang mga ahensiya sa kagamhanan.

Nahibaw-an, nga tulo ka mga menor-de-edad ang giapil og dakop sa mga awtoridad ug naa na karon sa kustodiya sa DSWD-7.

Sa gipatawag nga press conference kagahapon, si Atty. Kim Mendoza sa Fardec nagkanayon nga di makatawhanon ang gihimo sa 300 kapin ka mga pulis ngadto sa gibanabanang 200 ka mga mag-uuma nga ningsuway pagbabag sa pagkural sa 168 ka ektarya nga luna nga iya sa pamilyang Gantuangco.

Samtang, si Sr. Insp. Allan Cuizon, chief sa Public Information Officer (PIO) sa Cebu Provincial Police Office (CPPO) nga nahinabi sa Sun.Star Superbalita nipadayag nga wa sila mahulga niining maong bahad sa mga mag-uuma ug militanting grupo.