Tom, ubang officials hayan ipangkiha

GIMANDO-AN ni Gob. Gwen Garcia ang legal department sa Kapitolyo nga tun-an ug i-andam ang kaso nga posibleng ipasaka batok sa mga opisyal sa dakbayan sa Sugbo nga responsabli sa pagdonar sa usa ka bahin sa luna sa Osmeña Shrine sa Barangay Kalunasan ngadto sa mga protestante aron magamit nga sam-ang.

Ang gobernador midiklarar og suporta ngadto sa mga lumolupyo nga hugot nga ningsupak sa tukoron nga sementeryo sa dapit atol sa gipatawag nga public hearing kagahapon sud sa Capitol social hall.

“Dili mi mamalit og away, dili na maoy palisiya niining atong administrasyon. Apan ang palisiya usab nato mao nga kung ang kaigsuonan natong mga Sugbuanon… kung mokuyog mo, kuyog sad ko ninyo,” padayag ni Garcia.

Kapin sa 1,000 ka mga miyembro sa nagkadaiyang homeowners association sa Smallville, Beverly Hills Subdivision, Beverly Glen, mga lumolupyo sa Barangay Kalunasan, mga tinun-an ug magtutudlo sa Lyceum de Cebu, ug mga opisyal sa Barangay Lahug pinangulohan ni Kapitan Jovito Taborada ug kanhi Brgy. Kapitan ug karon Konsehal Mary delos Santos ang mitambong sa public hearing.

Mitambong usab sila si Bokal Julian Daan, Bokal Alex Binghay, Bokal Ribomapil Holganza ug Provincial Attorney Marino Martinquilla.

Sa gibasa nga position paper ni delos Santos, sila nanawagan nga bawi-on ang deed of donation sa kagamhanan sa syudad sa Sugbo ngadto sa Evangelical Christian Coalition of Cebu.

Matod niya nga illegal ang donasyon sanglit nakalapas kini sa election ban human ang deed of donation gipirmahan ni Kongresista Tomas Osmeña niadtong Mayo 4, pipila ka adlaw sa dili pa ang May 10, 2010 election samtang ang konseho sa syudad mihatag og pagtugot niadtong Abril 13, 2010 nga nasulod usab sa election period.

Si delos Santos midugang nga ang Lot No. 1273 diin himuon ang memorial park o sementeryo alang sa mga protestante giila nga cornland o agricultural land basi sa tax declaration.