P300 mil reward sa makatudlo hain si Bella

MOABOT sa P300 mil ang ihatag nga reward money sa kagamhanan sa lalawigan sa Sugbo ngadto sa makahatag og impormasyon aron madakpan na ang nagtago-tago nga akusado sa pagdagit ug pagpatay kang Ellah Joy Pique nga si Bella Ruby Santos.

Mao kini ang gipahibawo ni Gob. Gwen Garcia kagahapon atol sa press conference sa Kapitolyo human sa ilang tigom ni Sr. Supt. Patrocinio Comendador, director sa Cebu Provincial Police Office niadtong Huwebes.

Wala pay labot niini ang P50,000 nga natigom sa CPPO human nag-amot-amot ang kapulisan sa lalawigan diin mitampo usab og P2,000 ang amahan ni Ellah Joy nga si Renante Pique.

Si Garcia nibutyag nga atol sa tigom, gihatagan siya og detalye ni Comendador labot sa gihimo nga manhunt sa kapulisan batok ni Santos.

Nagdumili hinuon siya pagdetalye niini ngadto sa mga tigbalita sanglit nag-amping ang kapulisan nga di masipyat sa ilang mga lihok.

Matod niya ubos sa tipster program sa lalawigan, ang mga impormante nga makatudlo sa nahimutangan sa maong akusado itago ang identity aron di mailhan.

Si Bella Ruby gipangita sa mga awtoridad dul-an na sa duha ka buwan human malutsi og warrant of arrest sa husgado sa kasong pagdagit ug pagpatay sa 6-anyos nga batang biktima niadtong Pebrero ning tuiga sa lungsod sa Minglanilla.

Ang gobernador nagkanayon nga tanang impormasyon nga madawat sa kapulisan moagi og hugot nga proseso sama sa validation ug verification sa Task Force Against Criminality.

Iyang gipasalig nga naglihok ang kapulisan.

“We have a fugitive on the run here. We would not want to telegraph our punches. But I wish to assure you there is really work being done. Our police personnel are doing the best that they can,” matod ni Garcia.