Nagpatabang ni Aquino

NAGPATABANG na kang Presidente Benigno Aquino III ang mga tinun-an sa Mandaue City College nga gidumala ni Dr. Paulus Mariae Cañete labot sa kontrobersiya nga di pakuhaon og Teachers’ Licensure Exam sa Professional Regulation Commission (PRC) ang mga gradwado sa maong tunghaan.

Si Cañete sa pakighinabi sa Sun.Star Superbalita mikompirmar nga personal nga gihatod sa presidente sa ilang Supreme Student Council nga si Renejun Narandan ang suwat ngadto sa Office of the President sa Malacañang sa miaging semana.

Matod niya nga naningkamot ang ilang mga tinun-an sa MCC Tipolo campus nga mo-interbinir si Aquino sa kontrobersiya nga giatubang sa ilang tunghaan.

Gawas sa presidente, gipadad-an usab og suwat sa mga tinun-an ang Department of Justice (DOJ) ug Ombudsman central office aron mo-interbinir usab sa isyu ug kon gikinahanglan moimbestigar usab sa ugat sa maong isyu.

Niadtong Biyernes, usa ka full-page advertisement ang gipublikar sa igsuong mantalaan sa Sun.Star Superbalita nga Sun.Star Cebu nga gikan sa nagpaila nga mga original MCC graduates.

Sa maong open letter, miawhag ang mga original MCC graduates sa Commission on Higher Education (Ched) ug PRC nga tugtan ang ilang kauban nga mga graduates nga makasalmot sa Licensure Examination for Teachers karong Septiyembre 25.

Matod sa maong mga graduates nga di unta i-apil sa CHED ug PRC ang mga graduates sa MCC Cañete campus sa pulitika ug pagpanglutos.

“Spare us from politics and persecution! Allow us to take the LET board examination! Only then shall we believe that, indeed, Ched and PRC are working for the welfare of the students,” padayag sa maong grupo.

Si Atty. Dan Malayang, officer-in-charge sa PRC-Cebu sa pakighinabi sa Sun.Star Superbalita, nagkanayon nga di mausab ang ilang baruganan nga di pakuhaon og board exam ang 23 ka mga education graduates kon way pagtugot gikan sa Ched.

“Until and unless the CHED will come out with another issuance that will allow MCC graduates to take the September exam, PRC is bound to follow the July 25, 2011 publication as it has to respect the decision of a co-equal department of the government,” pasabot ni Malayang.

Niadtong Hulyo 25, 2011, usa ka notice to the public ang gipapublikar sa Ched sa usa ka mantalaan sa kaulohan nga nagpahibawo nga di pasalmoton sa licensure exam ang mga graduate sa MCC Cañete campus subay sa joint Ched-PRC Circular no. 01.