Canvass sa Compostela ipabalhin sa Manila

NIMANDO ang Commission on Elections en banc nga ibalhin ngadto sa Manila ang canvassing/counting sa mga election returns sa Compostela sa niaging May 10, 2010 election nga gikwestyon sa kampo ni kanhi Mayor Ritchie Wagas.

Kini human ang Comelec en banc niuyon sa motion to transfer venue of canvass/counting nga giduso ni Wagas niadtong Hunyo 27, 2011.

Matod ni Cebu Provincial Election Supervisor Atty. Lionel Marco Castillano nga nitugot ang en banc sa mosyon sa kanhi mayor human way pagsupak niini ang kampo nila ni Mayor-elect Joel Quiño ug kaubanan.

Si Quiño sa pakighinabi sa Sun.Star Superbalita niingon nga wa sila’y problema sa maong kamando-an sanglit ang gusto lang gyud nila masugdan na ang canvassing.

Andam niya dawaton kon unsa may resulta niini ug nisalig sa kaligdong ug kaangayan sa mga molangkob sa SBOC.

“Kon unsa man ang resulta, way problema nako. Kay useless na kon moreklamo pa ta total usa na lang bitaw ka tuig kapin, eleksiyon na man sad.” padayag niini.

Ang ilang kampo nagpaabot na lang sa mando sa Comelec en banc kanus-a gyud sugdan ang canvassing.

Gawas sa pagbalhin sa canvassing, nimando usab ang Comelec en banc sa pag-umol og bag-ong special board of canvassers nga maoy tahasan sa subling pag-ihap sa mga election returns nga giprotestaan ni Wagas.

Usa sa mga bug-at nga rason sa kanhi mayor sa pagpabalhin sa canvassing ngadto sa Manila mao ang kainit sa sitwasyon sa Compostela labi na sa mga tigpaluyo sa duha ka mga habig.

Ang Comelec en banc niadtong Hulyo 6, 2011, nimando sa habig nila ni Quiño nga moduso sa ilang komento sud sa tulo ka adlaw gikan sa pagdawat sa notisya.

Niadtong Oktubre 3, 2011, nisang-at sa ilang ko-mento ang mga respondents ug niuyon sa mosyon sa petitioner ug nanghinaut nga masugdan sa labing madaling panahon ang canvassing.

“Finding no objection on the part of the respondents, this Commission resolves to grant the motion. Justice and fairness prompts this Commission to transfer the venue of the canvassing considering that peace in the municipality and the province,…are uncertain…the attainment of neutral and credible counting of the results of the May 10, 2010 Elections in Compostela, Cebu,” matod sa mando sa Comelec en banc nga gipakanaug niadtong Nobiyembre 18, 2011.

Apan nipahimangno ang en banc nga “further motions that would, in effect, stay the proceedings would be strictly construed against their granting.”

Si Castillano niingon nga posibleng taga Comelec Manila ra ang molangkob sa bag-ong SBOC.

Matod niya nga kagahapon lang sa hapon nadawat niya ang kopya sa maong kamandoan ug nagpaabot sila og laing ka-mandoan alang sa guidelines sa pagpahigayon og canvassing/counting sa mga election returns.